რომელი წიგნები და ფილმები დაედო საფუძვლად სერიალს „ჩერნობილი“

4 ივნისს HBO-ზე „ჩერნობილის“ ბოლო, მეხუთე სერია გამოვიდა. სერიალი კრეიგ მეიზინს ეკუთვნის და ის დასრულებამდე გახდა თანამედროვე სერიალებს შორის ერთ-ერთი ყველაზე პოპულარული. 

ფინალური ეპიზოდის გამოქვეყნებისთანავე, მეიზინმა Twitter-ზე დაპოსტა იმ წიგნებისა და ფილმების სია, რომლის მიხედვითაც სერიალი გადაიღო. სიაში მოხვდა სვეტლანა ალექსიევიჩის "ჩერნობილის ლოცვა", გრიგორი მედვედევის "ჩერნობილის რვეული" ("Чернобыльская тетрадь"), ასევე დიდ სამამულო ომზე გადაღებული ფილმი "წადი და ნახე" ("Иди и смотри").

მეიზენის მიერ გამოქვეყნებული სრულია სია კი ასე გამოიყურება:

წიგნები

სვეტლანა ალექსიევიჩის "ჩერნობილის ლოცვა". წიგნი პირველად 1997 წელს გამოქვეყნდა, ის ინგლისურად 2005 წელს ითარგმნა.

ამერიკელი მწერლის ენდრიუ ლეზერბაროუს "ჩერნობილი 01:23:40". წიგნი დეტალურად აღწერს 1986 წლის 26 აპრილის მოვლენებს. 

ბრიტანელმა მწერალმა პირს პოლ რიდმა წუთობრივად აღადგინა 1986 წლის 26 აპრილისა და შემდეგი დღეების მოვლენები წიგნში სახელწოდებით "ცეცხლში. ჩერნობილის გმირებისა და მსხვერპლთა ისტორია". წიგნი 1993 წელს გამოიცა. 

ცნობილი ინჟინერისა და პუბლიცისტის, გრიგორი მედვედევის წიგნი "ჩერნობილის რვეული" ავარიიდან ერთ წლის შემდეგ, 1987 წელს დაიწერა, თუმცა მხოლოდ 1989 წელს გამოიცა. მედვედევი 1970-იან  ჩერნობილის ატომურ ელექტროსადგურზე მუშაობდა. წიგნს ინგლისურ თარგმანში ჰქვია "The Truth About Chernobyl".

საბჭოთა მეცნიერისა და დისიდენტის ჟორეს მედვედევის წიგნი "ჩერნობილის მემკვიდრეობა". მედვედევი 1990 წლიდან 1992 წლამდე რუსეთის მეცნიერებათა აკადემიის რადიობიოლოგიურ ექსპედიციაში მუშაობდა ჩერნობილის მახლობლად. ჟორეს მედვედევმა წიგნი ინგლისურ ენაზე 1992 წელს დაწერა. 

უკრაინელი მეცნიერის, მწერლისა და პუბლიცისტის, იური შერბაკის მიერ 1987 წელს დაწერილი წიგნი "ჩერნობილი". ის თვითმხილველთა მონათხრობს ეყრდნობა, რომელთა მიხედვითაც პირველად ააწყვეს მომხდარის სურათი.

ფილმები:

"წადი და ნახე" - ელემ კლიმოვის ფილმი, რომელიც გადაღებულია ალესია ადამოვიჩის სცენარის მიხედვით. ფილმი ნაცისტების მიერ ბელარუსიის ოკუპაციას ეხება. ფილმი ეკრანებზე 1985 წელს გამოვიდა.

"ჩერნობილი. 3828" - უკრაინული დოკუმენტური ფილმი, რომელიც 2011 წელს გამოვიდა, რეჟისორი სერგეი ზაბოლოტნი.

"ჩერნობილი. რთული კვირის ქრონიკა" - უკრაინელი დოკუმენტალისტი რეჟისორის ვლადიმირ შევჩენკოს ფილმი, რომელიც 1986 წელს გადაიღო. 1987 წლის მარტში შევჩენკო კიევში მძიმე ქიმიური მოწამვლისა და რადიაციული დასხივების შედეგად გარდაიცვალა, რომელიც მან ჩერნობილის ატომურ სადგურზე ყოფნის დროს მიიღო.

"ლუდმილას ხმა" - 2001 წლის შვედური დოკუმენტური ფილმი, რომელიც გადაღებულია ლუდმილა იგნატენკოს მოგონებების მიხედვით. ის მეხანძრე ვასილი იგნატენკოს ქვრივი იყო, რომელიც სადგურზე მომხდარი ავარიის შემდეგ ადგილზე ცეცხლის სალიკვიდაციოდ გაგზავნეს. ის მიღებული რადიაციის შედეგად მოსკოვის საავადმყოფოში გარდაიცვალა.

"გადარჩე კატასტროფაში: ჩერნობილის ბირთვული კატასტროფა" - 2006 წელს გადაღებული დოკუმენტური ფილმი.

"ნულოვანი საათი" - ბრიტანულ-კანადური დოკუმენტური სერიალი, რომელიც სხვადასხვა ინგლისურენოვან არხზე 2004-2006 წლებში გადიოდა. ჩერნობილის კატასტროფას პირველი სეზონის პირველი სერია ეძღვნება.

"წამები კატასტროფამდე" - ამერიკული დოკუმენტური სერიალი, ჩერნობილის შესახებ სერია პირველივე სეზონში გავიდა. 

და როგორც კრეიგ მეიზინი წერს, ამ ყველაფერთან ერთად გაეცნო ფოტოებსა და სხვა სახის რესურსს. ის რეკომენდაციას უწევს გერმანელი ფოტოგრაფის ჰერდ ლუდვიგის ფოტოალბომს "ჩერნობილის ხანგრძლივი ჩრდილი" და კანადელი ფოტოგრაფის, რობერტ პოლიდორის "გაუცხოების ზონა: პრიპიატი და ჩერნობილი". მეიზინი ასევე რეკომენდაციას უწევს სამეცნიერო ნაშრომს, IAEA-ს ანგარიშს.