თბილისში „ბაროკოს ფესტივალი“ გაიმართება

თბილისში 13 ნოემბრიდან „თბილისის ბაროკო ფესტივალი“ გაიმართება. თბილისის მერიის კულტურის სამსახურის ინფორმაციით, ფესტივალის ფარგლებში, კონცერტები, წარმოდგენები და შეხვედრები ცნობილ ადამიანებთან გაიმართება. ღონისძიებას ტრადიციულად მსოფლიოში აღიარებული ვარსკვლავები- დავიდე ამადიო (ჩელო, იტალია), სერჯო აცოლინი (ფაგოტი, იტალია), ბალაჟ მატე (ჩელო, უნგრეთი), ჟოზეპ მარია მარტი დურანი (თეორბო, ესპანეთი), დანიელ გარაი მორაგუესი (დასარტყამი საკრავები, ესპანეთი), ანსამბლი Fuoco E Cenere (საფრანგეთი), გ. ალექსიძის სახელობის თბილისის თანამედროვე ბალეტი და სხვები ესტუმრებიან.

წელს, ფესტივალი საიუბილეო თარიღს ახალი პროექტით „ცეკვა ბაროკოს მუსიკაში და თანამედროვე ქორეოგრაფია“ ხვდება, რაც ძველი და თანამედროვე ხელოვნების პერფორმატიული წარმოდგენა იქნება. პროექტი ექსპერიმენტულ, ძველისა და თანამედროვე ხელოვნების წარმოჩენას ითვალისწინებს, რაც ერთი მხრივ, ბაროკოს პერიოდის მუსიკის ავთენტურ შესრულებას, მეორე მხრივ, თანამედროვე ქორეოგრაფიისა და ავანგარდული კოსტიუმებით შექმნილ ქართული თანამედროვე ხელოვნების ახალი ნიმუშის წარმოჩენას მოიცავს.

უწყების ცნობით, პროექტის ფარგლებში, 18-19 ნოემბერს, რუსთაველის თეატრში მაყურებელი მუსიკალურ-ქორეოგრაფიულ წარმოდგენას „ძველებური ცეკვები“ იხილავს(კოსტიუმების მხატვარი - უტა ბექაია), ხოლო 24-25 ნოემბერს, სამეფო უბნის თეატრში წარმოდგენილი იქნება თანამედროვე ბალეტი „ფოლია“. პროექტი „ცეკვა ბაროკოს მუსიკაში და თანამედროვე ქორეოგრაფია“ „შემოქმედებითი საქართველოს“ კონკურსის გამარჯვებულია.

ფესტივალის ფარგლებში დაგეგმილია საინტერესო შეხვედრები საქართველოს პარლამენტის ეროვნულ ბიბლიოთეკაში, ხელოვნების სასახლეში, ვახტანგ ჭაბუკიანის მემორიალურ სახლ-მუზეუმსა და საქართველოს ეროვნულ გალერეაში, რომელსაც გია ბუღაძე, მარიამ ალექსიძე, გიორგი კალანდია, თამარ ჩხეიძე და გიორგი კეკელიძე ჩაატარებენ.

რიგით მეხუთე ფესტივალი 13 დეკემბრის ჩათვლით გაგრძელდება და მისი მხარდამჭერები საქართველოს განათლების, მეცნიერების, კულტურისა და სპორტის სამინისტრო, თბილისის მერია, შემოქმედებითი საქართველო, თბილისის სახელმწიფო კამერული ორკესტრი „საქართველოს სინფონიეტა“ და იტალიის საელჩო არიან.