დავით ზალკალიანმა და თეა წულუკიანმა ლევილის მამულის რეაბილიტაციის პირველი ეტაპის დასასრულის აღსანიშნავ ცერემონიაში მიიღეს მონაწილეობა

საქართველოს ვიცე-პრემიერმა, საგარეო საქმეთა მინისტრმა, დავით ზალკალიანმა, კულტურის, სპორტისა და ახალგაზრდობის მინისტრმა თეა წულუკიანმა, ქალაქ ლევილის მერთან ერთად მონაწილეობა მიიღეს ლევილის ქართული მამულის რეაბილიტაციის პირველი ეტაპის დასასრულის აღსანიშნავ ცერემონიაში, რომლის ფარგლებშიც საზეიმოდ გაიხსნა პროექტის ფარგლებში რეაბილიტირებული ე.წ. ორანჟერეის შენობა.

საზეიმო ღონისძიებას ისტორიული დიასპორის წარმომადგენლები, საქართველოს პარლამენტის წევრები, საქართველოს საელჩოს და საგარეო საქმეთა სამინისტროს წარმომადგენლები ესწრებოდნენ.
ღონისძიებაზე სიტყვით გამოსვლისას, ვიცე-პრემიერმა ხაზი გაუსვა ისტორიული მამულის მნიშვნელობას როგორც ქართული იდენტობის, ასევე ევროპაში საქართველოს შემდგომი პოპულარიზაციისთვის.

„2016 წელს ლევილის მამულის საქართველოსთვის გადმოცემით, აღსრულდა პირველი დემოკრატიული რესპუბლიკის მთავრობის წევრთა სურვილი და ანდერძი - ლევილის მამული დამოუკიდებელ და თავისუფალ საქართველოს გადსაცემოდა. ამ ფაქტით კიდევ ერთხელ გაესვა ხაზი ქართული ემიგრაციის უდიდეს პატრიოტიზმს და თავდადებას საქართველოს მიმართ. მამულის გადმოცემის შემდეგ, მთავარი საზრუნავი მისი ისტორიული როლის და დანიშნულების გააზრება იყო, რაც აისახა ქართული კულტურის კერის შექმნის იდეაში, რომელიც შეინარჩუნებდა მის ისტორიულ მნიშვნელობას და ამავდროულად, შეიძენდა ახალ, მომავალზე ორიენტირებულ დანიშნულებას”, - განაცხადა მინისტრმა.

მინისტრის ინფორმაციით, ბოლო პერიოდში, მამულში ქართველი და ფრანგი ექსპერტების ჩართულობით დიდი მოცულობის სამუშაოები, როგორც ტექნიკური, ასევე ორგანიზაციული ხასიათის, განხორციელდა, ხოლო პროექტის ძირითადი - შატოს რეაბილიტაციის და ახალი მშენებლობების ნაწილი - მეორე ეტაპი, უახლოეს მომავალში დაიწყება.

საქართველოს მთავრობის გადაწყვეტილებით, მამულის რეკონსტრუქცია-რეაბილიტაციის მეორე ეტაპს სათავეში კულტურის, სპორტისა და ახალგაზრდობის სამინისტრო ჩაუდგება.გადაწყვეტილება განპირობებული იყო იმ გარემოებით, რომ პროექტის მომდევნო ეტაპი ძირითადად, კულტურული კომპონენტებისგან შედგება, რაც აუცილებელს ხდის მის წარმართვას კულტურის სამინისტროს მიერ.

დავით ზალკალიანმა ლევილის მამულის რეაბილიტაციის სამომავლო საქმეში კოლეგას - კულტურის, სპორტისა და ახალგაზრდობის მინისტრს, თეა წულუკიანს წარმატება უსურვა. მან ასევე მადლობა გადაუხადა ფრანგულ მხარეს.

ლევილის მამულში სამშენებლო-სარეაბილიტაციო სამუშაოების პროექტირება-განხორციელება საქართველოს საგარეო საქმეთა სამინისტროს ხელმძღვანელობით 2017 წლიდან მიმდინარეობდა. პირველი და საკმაოდ მოცულობითი სამუშაოა პროექტირება და პროექტის დამტკიცება.

ამ ეტაპზე დასრულდა სამუშაოების პირველი ნაწილი, ე.წ. ორანჟერეის პროექტი, რის შედეგადაც, ორანჟერეის ტერიტორიაზე კეთილმოეწყო 150 კვ. მეტრის ფართი, მოპირკეთდა ეზო, მისასვლელი და მისი მიმდებარე ტერიტორია.