თბილისში, ცნობილი ბრაზილიელი მომღერლის, პაულა მორელენბაუმისა და თბილისის სიმფონიური ორკესტრის კონცერტი გაიმართა

ჯანსუღ კახიძის სახელობის თბილისის მუსიკალურ-კულტურულ ცენტრში ჯანსუღ კახიძის სახელობის მე-7 საერთაშორისო მუსიკალური ფესტივალის ფარგლებში, ცნობილი ბრაზილიელი მომღერლის პაულა მორელენბაუმისა და მისი კვარტეტის, ასევე, თბილისის სიმფონიური ორკესტრის კონცერტი გაიმართა, რომელსაც მაესტრო ვახტანგ კახიძე დირიჟორობდა. საღამოს საქართველოს კულტურის, სპორტისა და ახალგაზრდობის მინისტრის პირველი მოადგილე კახა სიხარულიძე დაესწრო.

პაულა მორელენბაუმი 10 წლის განმავლობაში „ბოსა ნოვას“ სტილის ლეგენდის, ანტონიო კარლოს ჯობიმის ჯგუფის „Nova Banda“ წევრი იყო, რამაც მისი წარმატებული სასიმღერო კარიერის მიმართულება განსაზღვრა. იგი კონცერტებს მთელი მსოფლიოს მასშტაბით მართავს, გამოშვებული აქვს რამდენიმე ალბომი სხვადასხვა ცნობილ მუსიკოსთან ერთად. 2016 წელს პაულა მორელენბაუმი სპეციალური სტუმრის სტატუსით მონაწილეობდა ივან ლინსისა და თბილისის სიმფონიური ორკესტრის ერთობლივ კონცერტში, რომელიც ჯანსუღ კახიძის სახელობის მე-2 საერთაშორისო მუსიკალური ფესტივალის ფარგლებში გაიმართა.

ჯანსუღ კახიძის სახელობის მე-7 საერთაშორისო მუსიკალური ფესტივალი საქართველოს კულტურის, სპორტისა და ახალგაზრდობის სამინისტროს და თბილისის მერიის მხარდაჭერით იმართება და მასში მონაწილეობენ როგორც ქართველი, ასევე უცხოელი შემსრულებლები. 8 მაისს ფესტივალი თბილისის სიმფონიური ორკესტრის კონცერტით გაიხსნა. სოლისტები: ეკა მამალაძე, ნეკა სებისკვერაძე, ნატო კახიძე, დათო ნოზაძე და გედევან ჯინჭარაძე. კონცერტს მაესტრო ვახტანგ კახიძე დირიჟორობდა. ფესტივალი საზეიმოდ 22 მაისს გრემის მუსიკალური ჯილდოს მრავალგზის მფლობელის, ბრაზილიელი კომპოზიტორის, მომღერლისა და პიანისტის ივან ლინსის, მისი ბენდისა და თბილისის სიმფონიური ორკესტრის კონცერტით დაიხურება. კონცერტის დირიჟორი - მაესტრო ვახტანგ კახიძე.

ჯანსუღ კახიძის სახელობის საერთაშორისო მუსიკალური ფესტივალი 2015 წელს ჯანსუღ კახიძის სახელობის თბილისის მუსიკალურ - კულტურული ცენტრის ინიციატივითა და კულტურის სამინისტროს მხარდაჭერით დაფუძნდა და ის ყველა ჟანრის მუსიკის მოყვარულისთვის არის განკუთვნილი. პირველი ფესტივალი ცნობილი ქართველი დირიჟორის, ჯანსუღ კახიძის 80 წლის საიუბილეო თარიღს მიეძღვნა. ტრადიციულად, ფესტივალი ყოველ წელს იმართება და მისი პროგრამა აგებულია თბილისის სიმფონიური ორკესტრისა და პოპულარული მუსიკის მსოფლიო ვარსკვლავების შემოქმედებით თანამშრომლობაზე. სხვადასხვა წლებში თბილისის სიმფონიურ ორკესტრთან ერთად, ფესტივალში მონაწილეობა მიღებული აქვთ მსოფლიო ვარსკვლავებს: The Manhattan Transfer, New York Voices, TAKE 6, Ivan Lins, Bob James, Patti Austin, The Real Group, Dee Dee Bridgewater, Janoska Ensemble. ამასთან, ფესტივალი აქტიურად ეწევა ქართული მუსიკის პოპულარიზაციას და მსმენელს სთავაზობს საინტერესო პროექტებს ქართველი შემსრულებლების მონაწილეობით.