თეა წულუკიანი: ამირანაშვილის სახელობის მუზეუმის მთავარი კორპუსიდან, რომელიც ავარიულია, გადატანილია 60 ექსპონატი, ტრანსპორტირების პროცესი გაგრძელდება მანამდე, ვიდრე სრული კოლექცია არ იქნება გადატანილი უსაფრთხო შენობაში

დღეისთვის შალვა ამირანაშვილის სახელობის მუზეუმის მთავარი კორპუსიდან, რომელიც ავარიულია, გადატანილია 60 ექსპონატი. დღესაც მიმდინარეობდა ტრანსპორტირების პროცესი და გაგრძელდება მანამდე, ვიდრე სრული კოლექცია არ იქნება გადატანილი უსაფრთხო შენობაში, - ამის შესახებ ვიცე-პრემიერმა, კულტურის, სპორტისა და ახალგაზრდობის მინისტრმა, თეა წულუკიანმა გადაცემაში „იმედი LIVE“ განაცხადა.

მისი თქმით, ხელოვნების მუზეუმს გაუჩნდა ახალი ინფრასტრუქტურა.

„ეს შენობა ადრე, ვიდრე ამ პოზიციაზე დავინიშნებოდი, ეკუთვნოდა ჯანაშიას მუზეუმს, თუმცა ის აღარ ეკუთვნის ჯანაშიას მუზეუმს, ის არის კორპუსი, რომელიც სრულად დარეგისტრირდა ამირანაშვილის სახელობის ხელოვნების მუზეუმის მფობელობაში. შესაბამისად, ამ ფორმით ხელოვნების მუზეუმს გაუჩნდა ახალი ინფრასტრუქტურა. თანამედროვე, არაავარიული, სადაც უკვე ჩვენ საგანძური კი არ გაგვაქვს ამ მუზეუმიდან სხვა მუზეუმში, არამედ გადადის იმავე მუზეუმის სხვა კორპუსში. ეს კორპუსი დარჩება ხელოვნების მუზეუმის საკუთრებად.

ყველაფერი კარგად მიმდინარეობს, იტალიელი ექსპერტები არიან ჩართული ქართულ იტალიური ჯგუფი მუშაობს, როგორც დროებით გამაგრებაზე, ისე, ტრანსპორტირებაზე და ამ ყველაფერს სათავეში უდგას შალვა ამირანაშვილის ხელოვნების მუზეუმის დირექტორი, ეროვნული მუზეუმის დირექტორის პირველი მოადგილე ნიკა ახალბედაშვილი, რომელიც თავიდან დიდად ვერ შეითვისეს მისი ახალგაზრდა ასაკის გამო, წინა თაობის წარმომადგენლებმა, მაგრამ ეს ქვეყანა ყველასია. მინდა დიდი მადლობა ვუთხრა ბატონ ნიკას, იმ ჯარისკაცობისთვის, რასაც ამ ქვეყნის დაცვა და ქართული კულტურისთვის ამაგი ჰქვია“, - განაცხადა თეა წულუკიანმა.