„ბერლინალეზე“ ქართული დელეგაციის წევრები აქტიურ შეხვედრებს მართავენ

ბერლინის 74-ე საერთაშორისო კინოფესტივალზე კულტურისა და სპორტის მინისტრის მოადგილემ, ეროვნული კინოცენტრის დირექტორის მოვალეობის შემსრულებელმა კობა ხუბუნაიამ ეროვნული კინოცენტრის წარმომადგენლებთან, ქართველ რეჟისორებსა და პროდიუსერებთან ერთად საერთაშორისო ავტორიტეტული ორგანიზაციების წარმომადგენლებთან შეხვედრა გამართა.

ბერლინის საერთაშორისო კინოფესტივალზე დოჰას კინოინსტიტუტის ფონდის ხელმძღვანელთან, ხალილ ბენკირანისთან, შეხვედრისას მხარეებმა ისაუბრეს კინოს დაფინანსების სქემებსა და ქართველი პროდიუსერებისა და რეჟისორებისთვის დოჰას კინოინსტიტუტის ფონდიდან დაფინანსების მიღების შესაძლებლობებზე.
დოკუმენტური კინომარკეტის „Sunny side of the doc“ წარმომადგენელთან, კლიმონს მიშალონისთან, გამართულ შეხვედრაზე ისაუბრეს აღნიშნულ კინომარკეტზე ქართული სტენდის მოწყობის შესაძლებლობებსა და ღონისძიებაზე ქართველი პროდიუსერებისა და რეჟისორების წარმოჩენაზე.

ასევე, ქართული დელეგაცია შეხვდა სან-სებასტიანის საერთაშორისო კინოფესტივალის შესარჩევი კომისიის ხელმძღვანელს, რობერტო კუეტო ლერას, შეხვედრაზე დასრულებული ქართული ფილმების შესახებ ისაუბრეს და განიხილეს მიმდინარე პროექტები ფესტივალზე წარსადგენად.

შეხვედრა გაიმართა ცნობილ პროდიუსერ ფრანჩესკო მელზი დ'ერილისთანაც. საუბრისას ქართული დელეგაციის წარმომადგენლებმა და ფრანჩესკო მელზი დ'ერილიმ განიხილეს საქართველოს კინოცენტრთან თანამშრომლობის პერსპექტივები კოპროდუქციის მიმართულებით. შეხვედრები კინოინდუსტრიისა და კინოს სფეროს წარმომადგენლებთან ფესტივალის მიმდინარეობისას აქტიურად გაგრძელდება.

15-25 თებერვალს ბერლინში იმართება 74-ე საერთაშორისო კინოფესტივალი, რომლის ფარგლებში 15-21 თებერვალს ტარდება ევროპული კინოს ბაზრობა (EFM). ბაზრობაზე ეროვნული კინოცენტრი, კულტურისა და სპორტის სამინისტროს, ღვინის ეროვნული სააგენტოსა და „ჯორჯიან ეარვეისის“ მხარდაჭერით, ტრადიციულად, საქართველოს სტენდით არის წარმოდგენილი, რომელიც წარმოაჩენს ქართული კინოს უმდიდრეს მემკვიდრეობას, წარადგენს ახალ პროექტებს, პოპულარიზაციას უწევს საქართველოს, როგორც აღმოსავლეთ ევროპაში კინოგადაღებებისთვის უმნიშვნელოვანეს ქვეყანას.

ქართული კინოს სათანადოდ წარდგენისა და პოპულარიზაციის მიზნით დელეგაციაში არაერთი რეჟისორი და პროდიუსერია, რომლებიც შეძლებენ სხვადასხვა საპროდიუსერო კომპანიის წარმომადგენლების გაცნობას და დასახავენ გეგმებს, როგორც ერთობლივი პროდუქციის შესაქმნელად, ასევე ქვეყნის კინოწარმოების განვითარების კუთხით. ეს ხელს შეუწყობს ქართველი კინოხელოვანების საერთაშორისო კავშირების განმტკიცებასა და მათი მიმდინარე პროექტების წარმატებას. კინორეჟისორებითა და პროდიუსერებით დაკომპლექტებულ დელეგაციას შეუძლია საკუთარი შემოქმედებით თუ სამომავლო პროექტებით დააინტერესოს ევროპული ბაზარი და ხელი შეუწყოს ქართული კინოს პოპულარიზაციას.

ევროპულ კინობაზრობაზე საქართველოს დელეგაცია, რომელსაც დირექტორის მოვალეობის შემსრულებელი კობა ხუბუნაია ხელმძღვანელობს, კიდევ არაერთ მნიშვნელოვან შეხვედრას გამართავს პროდიუსერებთან, კომპანიების, კინოთეატრების, ონლაინპორტალებისა თუ საერთაშორისო კინოფესტივალების წარმომადგენლებთან. ასევე, დაიგეგმება პროექტები, რომლებიც საქართველოში უცხოურ ინვესტიციებს მოიზიდავს. ფესტივალის მსვლელობისას დაგეგმილია საქართველოს, როგორც კინოწარმოებისთვის მიმზიდველი ქვეყნის, რეკლამირება/პოპულარიზაცია. ამასთან დაკავშირებით საქართველოს სტენდზე ეროვნული კინოცენტრის გუნდთან ერთად მუშაობენ პროგრამის - „გადაიღე საქართველოში“ - წარმომადგენლები.

ბერლინის საერთაშორისო კინოფესტივალზე მოქმედებს „ევროპული კინოს ხელშეწყობის“ (EFP - European Film Promotion) ერთ-ერთი საკონკურსო პროგრამა „European Shooting Stars“-ი.

კონკურსისთვის კინოინდუსტრიის საერთაშორისო ექსპერტების ჟიურიმ 2023 წლის ათ ევროპელ ტალანტს შორის გამოარჩია საქართველოს ეროვნული კინოცენტრის მიერ წარდგენილი მსახიობი სალომე დემურია, რომელიც რუსუდან გლურჯიძის ფილმში „ანტიკვარიატი“ შესრულებული როლისთვის ევროპული კინოს „ამომავალ ვარსკვლავებს“ შორის დასახელდა. მას ჯილდოს 19 თებერვალს გადასცემენ. კინოფესტივალის მსვლელობისას მსახიობს, უცხოელ კოლეგებთან ერთად, შესაძლებლობა ექნება პირისპირ შეხვდეს კინოინდუსტრიის ცნობილ წარმომადგენლებს.
საგულისხმოა, რომ „EFP“-ი საერთაშორისო ქსელია, რომელიც 37 ქვეყნის კინოორგანიზაციას აერთიანებს. მათ შორის არის საქართველოს კინემატოგრაფიის ეროვნული ცენტრი.

ქართულ და ევროპულ კინოს ათწლეულების მანძილზე მჭიდრო ურთიერთობა აკავშირებს. სწორედ ამ ურთიერთობის გაღრმავებისა და ახალი თანამშრომლობის პერსპექტივების წარმოსაჩენად იმყოფება წლევანდელ „ბერლინალეზე“ საქართველოს კინოცენტრის წარმომადგენლობითი დელეგაცია.