მია ფეროუს ვაჟი ვუდი ალენის წინააღმდეგ აგორებულ სკანდალში დედას ადანაშაულებს

მსახიობ მია ფეროუს და რეჟისორ ვუდი ალენის შვილად აყვანილმა ვაჟმა მოზეს ფეროუმ საკუთარ ბლოგზე პოსტი გამოაქვეყნა, სადაც მხარი მამას დაუჭირა.

1992 წელს მია ფეროუმ ალენი მათი შვილობილის, 7 წლის დილანის მიმართ სექსუალურ  ძალადობაში დაადანაშაულა. საქმე სასამართლომდე არ მისულა, რადგან ფეროუმ ჩათვალა, რომ ეს ტრავმული იქნებოდა მისი ქალიშვილისთვის.

2014 წელს დილან ფეროუმ თავად დაწერა სვეტი, სადაც ალენი საჯაროდ პირველად დაადანაშაულა ძალადობაში. სამი წლის შემდეგ მან კიდევ გაიხსენა ეს ამბავი და ჰოლივუდი უმოქმედობაში დაადანაშაულა.

ალენი ამ ბრალდებას უარყოფს. მოზეს ფეროუც მიიჩნევს, რომ რეჟისორი უდანაშაულოა და ამტკიცებს, რომ მია ფეროუ თავად იყენებდა ბავშვებს და მანიპულირებდა მათი საშუალებით. 

მსახიობმა მია ფეროუმ სულ 14 ბავშვი გაზარდა (მათგან სამი ამ დროისთვის გარდაცვლილია). ოთხი მისი ბიოლოგიური შვილი იყო, დანარჩენი 10 კი იშვილა. მოზესი მან 1980 წელს იშვილა. დაახლოებით ამ დროს დაიწყო მან ვუდი ალენთან შეხვედრები. მიუხედაად იმისა, რომ ისინი არასდროს ყოფილან დაქორწინებულნი და არც ერთად უცხოვრიათ, რეჟისორი დიდ დროს ატარებდა მიას შვილებთან. 1992 წელს მიას შუამდგომლობით ვუდი ალენს მოზესის და დილანის მამობის უფლება მიეცა. მალე მსახიობმა შეიტყო ვუდი ალენის და მიას კიდევ ერთი შვილობილის, 21 წლის სუნ-ის რომანის შესახებ და მოზესის თქმით, სწორედ ამ დროიდან დაარქვა მიამ ალენს „მონსტრი“ და „სატანა“, შვილებისგან კი მოითხოვა, მათი ცხოვრებიდან ორივე ამოეშალათ.

მოზესი განმარტავს, რომ სუნ-ი მიამ სხვა ქორწინებისას იშვილა და ის ალენის შვილობილი არ ყოფილა. რეჟისორთან კი მან რომანი სრულწლოვნების შემდეგ გააბა.

მოზესის თქმით, ბავშვობაში სუნ-ის არავითარი ურთიერთობა არ ჰქონია ვუდი ალენთან. ეს ურთიერთობა მას შემდეგ დაიწყო, რაც ფეროუმ ალენს უკვე სრულწლოვან სუნ-ისთან მეტი დროის გატარება სთხოვა და მასაც გოგო დაჰყავდა „ნიუ-იორკ ნიქსის“ საკალათბურთო კლუბის მატჩებზე.

„მართალია, მათი ურთიერთობა უხერხული და დამანგრეველი იყო ჩვენი ოჯახისთვის და ამან საშინელი ტკივილი მიაყენა დედაჩემს, მაგრამ არც ისეთი დამღუპველი იყო ჩვენთვის, როგორც დედაჩვენის დაჟინება, რომ ეს ჩვენი ცხოვრების ცენტრი გამხდარიყო“, - წერს მოზესი.

მია ფეროუს ოჯახი იქ ვუდი ალენის გამოჩენამდეც არ ყოფილა ბედნიერი, - ამტკიცებს მოზესი და იხსენებს, თუ როგორ სასტიკად სჯიდა ის ბავშვებს, მათ შორის ინვალიდებსაც.

„ვხედავდი, როგორ მიათრევდნენ ჩემს და-ძმებს კიბეებზე და კეტავდნენ საძინებელში, ან საკუჭნაოში. ერთხელ მან ღამით სარდაფში ჩემი ძმა თადეუსიც კი ჩაკეტა, რომელიც გადატანილი პოლიომიელითის შემდეგ ნაწილობრივ პარალიზებული იყო“, - იხსენებს მოზესი.

ფეროუმ ერთხელ ისიც დასაჯა, როდესაც მის ოთახში ნახა ნივთი, რომელსაც დიდხანს ეძებდა. მან ბიჭს არ დაუჯერა, რომ მას არ აუღია. „სახეში დამარტყა და სათვალეები გამიტეხა. განმიცხადა, რომ ვტყუივარ და მაიძულა ჩემი და-ძმებისთვის მეთქვა, რომ მე ავიღე“, - წერს მოზესი და იხსენებს, თუ როგორ არეპეტიციებდა დედა მტირალ ბავშვს, როგორ შევიდოდა ის ოთახში, მოზესი კი ეტყოდა, რომ ნანობს საქციელს და ამას არასდროს ჩაიდენს. მას ფეროუმ ეს უამრავჯერ გაამეორებინა.

სხვა დროს დედამ ის აიძულა შიშველი დამდგარიყო ცალ ფეხზე და-ძმის წინაშე მხოლოდ იმიტომ, რომ მან ჯინსების ქამარს პეტლები თვითნებურად დააჭრა.

„პარადოქსულია, მაგრამ ასეთი აღზრდით, მე მისი ერთგული გავხდი, მაგრამ ამავდოულად სასტიკად მეშინოდა“, - წერს მოზესი.

დედისგან ყველაზე მეტი სუნ-ის ხვდებოდა, რომელსაც დამოუკიდებელი ხასიათი ჰქონდა. მოზესი იხსენებს, თუ როგორ ესროლა მას ერთხელ ფეროუმ ფაიფურის ლარნაკი და საბედნიეროდ, ააცილა. სხვა დროს კი მას ტელეფონის ყურმილით სცემა.

„თუნდაც არ ყოფილიყო მისი ურთიერთობა ვუდი ალენთან ტრადიციული, ამან მას სახლიდან გაქცევის შესაძლებლობა მისცა. სხვებს ნაკლებად გაუმართლა“, - წერს ფეროუს შვილობილი.

ის მსახიობის სამი აყვანილი შვილის გარდაცვალებასაც ოჯახის პრობლემებს უკავშირებს. მისი და ლარკი 2008 წელს ადამიანის იმუნოდეფიციტის ვირუსით 2008 წელს გარდაიცვალა, მეორე და, ტამი ტაბლეტების ზედოზირებით დაიღუპა. მოზესი ამტკიცებს, რომ ის დედასთან კონფლიქტის შემდეგ დიდხანს იყო დეპრესიაში და ბოლოს თავი მოიკლა, რაც შეეხება თადეუსს, რომელმაც მას ტამის ამბავი უამბო, 2016 წელს ცეცხლსასროლი იარაღით თავი მოიკლა.

მოზესის თქმით, 1992 წლის 4 აგვისტოს, როდესაც ეს სავარაუდო ძალადობა მოხდა, მია ფეროუ მეგობართან ერთად საყიდლებზე წავიდა. სახლში ალენის და 7 წლის დილანის გარდა იყვნენ 4 წლის რონანი, 14 წლის მოზესი, ფეროუს დაქალების სამი შვილი და ორი ძიძა. დედამ მოზესს ალენისთის თვალყურის დევნება დაავალა. იმ დროისთვის მან უკვე იცოდა ალენის სუნ-ისთან რომანის შესახებ.

დილან ფეროუ ამტკიცებდა, რომ იმ დღეს ალენმა ის სხვენში აიყვანა. თუმცა, მოზესის თქმით, ის დედის დავალებას ასრულებდა, ყურადღებით აკვირდებოდა ალენს და არ შეუმჩნევია, რომ ის და დილანი მისაღები ოთახიდან გასულიყვნენ. ამასთან, მაშინ სხვენი გაურემონტებელი იყო და იქ ვერ იქნებოდა სათამაშო რკინიგზა, რის შესახებ დილანი თავის ჩვენებაში ამბობს (დილანის თქმით, ალენმა მატარებლით გაართო და სწორედ ამ დროს იძალადა), მაგრამ არა 1992 წელს, არამედ მოგვიანებით. პირველად მას ეს რკინიგზა არცკი გახსენებია.

დილანი ვუდი ალენთან მეორე დღესაც ჩვეულებრივ ურთიერთობდა. ყველაფერი მაშინ დაიწყო, როდესაც ფეროუს იმ მეგობარმა დაურეკა, ვისთან ერთადაც საყიდლებზე იყო წასული. მან უამბო ძიძის მონათხრობი, რომ დივანზე მჯდარ დილანს ალენი მუხლებზე ადებდა თავს. ფეროუმ ამის შემდეგ გამოკითხა დაწვრილებით დილანი და ჩაიწერა ჩვენება სექსუალურ ძალადობაზე.

მოზესი იხსენებს, თუ როგორ მოითხოვა დედამ შვილებისგან მხარდაჭერა.

„მე დავწერე წერილი, სადაც ვთქვი, რომ მისი საქციელი საშინელი და უპატიებელი იყო და ის ჟურნალისტებსაც წავუკითხე. ვიცოდი, რომ ამით დედის კეთილგანწყობას მოვიპოვებდი. თუმცა, მამის საჯაროდ გაკრიტიკება ჩემი სინანულის მიზეზი გახდა“, - წერს მოზესი და განმარტავს, რომ იმ დროისთვის მას არ ჰქონია ინფორმაცია იმის შესახებ, რომ პოლიციის მოთხოვნით, კონექტიკუტში Yale New Haven-ის კლინიკაში დილანს ფსიქოლოგიური ექპერტიზა ჩაუტარდა, რომელმაც ძალადობა არ დაადასტურა.

მოზესი აცხადებს, რომ 20 წლის შემდეგ დედისგან თავის დაღწევა მოახერხა და ამაში მას ფსიქოთერაპია დაეხმარა, რის შედეგადაც საკუთარი ბავშვობის გაანალიზება მოახერხა.