ოთარ ჭილაძის „აველუმი“ გერმანულად ითარგმნა

ქართული წიგნის ეროვნული ცენტრის ხელშეწყობით, ოთარ ჭილაძის „აველუმი“ გერმანულ ენაზე ითარგმნა.

ნაწარმოები გამომცემლობა Matthes & Seitz Berlin-მა თარგმნა. წიგნის გერმანულენოვან თარგმანზე კრისტიანე ლიხტენფელდმა იმუშავა.

„აველუმი“ ჭილაძის მეხუთე რომანია. 

„ოთარ ჭილაძემ პირველად დაწერა „თანამედროვე რომანი” იმ აზრით, რომ პირველად მიმართა იმ ეპოქას, რომელშიც ცხოვრობდა და ცხოვრობს, შექმნა თანამედროვე გმირი. „გზაზე ერთი კაცი მიდიოდა”-დან მოყოლებული, სადაც მან მითოლოგიური საქართველო აღწერა, ის ნელ-ნელა მოემართებოდა თანამედროვეობისაკენ და აი, როგორც იქნა, მოაღწია კიდეც. თუმცა იგი ამ რომანში მხოლოდ დღევანდელობის აღწერით არ შემოფარგლულა. უფრო მეტიც, რომანის ძირითადი კორპუსი საბჭოურ პერიოდს ხატავს, დაახლოებით მისი ასაკის და, უნდა ვივარაუდოთ, დაახლოებით მისი თვისებების მქონე ადამიანს – ე. წ. „საბჭოთა ინტელიგენტს”, „საბჭოთა მწერალს”, რომელიც სინამდვილეში არაა არც საბჭოთა ინტელიგენტი და არც საბჭოთა მწერალი, მაგრამ არც აშკარა „ანტისაბჭოთა ელემენტია”.მსგავსი გმირების ნაკლებობას საბჭოთა პერიოდშიც კი არ უჩიოდა საბჭოთა მწერლობა, მაგრამ ოთარ ჭილაძის მიერ დახატული პერსონაჟი მაინც ბევრი რამით განსხვავდება მათგან, პირველ რიგში კი განსხვავდება იმ ინტიმურ-რეფლექსიური დამოკიდებულებით, რომელიც ავტორს აქვს გმირისა და იმ ეპოქისადმი, რომელშიც ისიც და მისი პერსონაჟებიც გვერდიგვერდ ცხოვრობდნენ“ - ვკითხულობთ წიგნის რეცენზიაში, რომელიც შოთა იათაშვილმა დაწერა. 

პროზაიკოსი, პოეტი და დრამატურგი ოთარ ჭილაძე 1933 წელს სიღნაღში დაიბადა. იგი ავტორია ისეთი ცნობილი ნაწარმოებებისა, როგორებიც არის „გზაზე ერთი კაცი მიდიოდა“, „წათეს წითელი წაღები'', „ყოველმან ჩემმან მპოველმან'', „გოდორი'', „რკინის თეატრი'' და ა.შ.  მწერალს მიღებული აქვს სახელმწიფო და შოთა რუსთაველის სახელობის პრემიები, იყო თბილისის საპატიო მოქალაქე. ოთარ ჭილაძის ნაწარმოებების მიხედვით გადაღებულია ფილმები, დადგმულია სეპქტაკლები.

1998 წელს ჭილაძე ნომინირებული იყო ნობელის პრემიაზე ლიტერატურის დარგში, მსოფლიოს მხოლოდ ხუთ სხვა მწერალთან ერთად.

ოთარ ჭილაძე გარდაიცვალა 2009 წელს. დასაფლავებულია მთაწმინდის პანთეონში.