მედია: საფრანგეთის ექსპრემიერს სახელმწიფო სახსრების გაფლანგვას ედავებიან

საფრანგეთის პრეზიდენტობის ყოფილი კანდიდატი ფრანსუა ფიიონი და მისი მეუღლე პენელოპა, შესაძლოა სახელმწიფო სახსრების გაფლანგვის ბრალდებით სასამართლოს წინაშე წარდგნენ. Deutsche Welle-ს ინფორმაციით, ამის შესახებ საფრანგეთის იუსტიციის ორგანოებში საკუთარ წყაროებზე დაყრდნობით სააგენტო dpa იუწყება.

მემარჯვენე პოლიტიკოსის მეუღლის ფიქციური დასაქმების გამოძიება ოფიციალურად 2017 წლის მარტში დაიწყო. მიმდინარე წლის იანვარში ფრანგული გამოცემა Le Canard Enchaine წერდა, რომ ფიიონმა, პარლამენტის დეპუტატად მუშაობის პერიოდში მეუღლე საკუთარი თანაშემწედ დანიშნა. პენელოპა ფიიონმა პარლამენტში მუშაობის სანაცვლოდ რამდენიმე წლის განმავლობაში 800 ათასი ევრო მიიღო, თუმცა, გამოძიების მტკიცებით, არანაირი სამუშაო არ შეუსრულებია.

გარდა ამისა, პოლიტიკოსის მეუღლე ლიტერატურულ ჟურნალ La Revue des Deux Mondes-ში მუშაობდა, რომელიც ფრანსუა ფიიონის ერთ-ერთ მეგობარ მილიარდერს ეკუთვნოდა. სავარაუდოდ, პრეზიდენტობის კანდიდატის მეუღლე რეალურად არც ამ პოზიციაზე მუშაობდა, ან მისი წვლილი სიმბოლური მუშაობით შემოიფარგლებოდა.

პოლიტიკოსის მეუღლის გარშემო აგორებულ სკანდალს საფრანგეთში „პენელოპაგეითი“ უწოდეს. ფრანსუა ფიიონი, რომელიც ნიკოლა სარკოზის პრეზიდენტობის დროს მთავრობის მეთაურის პოსტს იკავებდა, ყველა ბრალდებას უარყოფს.

2017 წლის აპრილში გამართული საპრეზიდენტო არჩევნების პირველ ტურში რესპუბლიკური პარტიის კანდიდატმა ხმათა 20,01% მიიღო და მესამე ადგილზე გავიდა. მეორე ადგილზე გასულ მარინ ლე პენამდე მას დაახლოებით ხმათა 1,3% დააკლდა.