CNN: 2017 წელს აშშ-მა რუსეთიდან გაიყვანა ჯაშუში რომელიც ამერიკას პუტინზე ინფორმაციას აწვდიდა

2017 წელს აშშ-ის დაზვერვამ რუსეთიდან მალულად გაიყვანა ერთ-ერთი მნიშვნელოვანი აგენტი, რომელიც რუსეთის ხელისუფლებაში მუშაობდა. ამის შესახებ ინფორმაციას CNN-ი წყაროებზე დაყრდნობით ავრცელებს, რომლებიც პრეზიდენტ ტრამპის ადმინისტრაციიდან არიან.

CNN-ის ცნობით, ეს ჯაშუში აშშ-ს ინფორმაციას აწვდიდა კრემლის შიდა საქმიანობის, ასევე პრეზიდენტ ვლადიმერ პუტინის გეგმების და მოსაზრებების შესახებ. CNN-ის ერთ-ერთი წყაროს ცნობით, აშშ-ის ხელისუფლებას მანამდე არ ჰყოლია რუსეთის ხელისუფლებაში ასეთი მნიშვნელოვანი ინფორმატორი. 

აგენტის არსებობა მკაცრად გასაიდუმლოებული იყო, ის აშშ-ის სასარგებლოდ წლების განმავლობაში მუშაობდა. რუსეთიდან მისი გაყვანა ტრამპისა და მისი ადმინისტრაციის თანამშრომლების მიერ საიდუმლო ინფორმაციასთან უყურადღებო დამოკიდებულების გამო გადაწყდა, ამტკიცებს CNN-ი.

როგორ მოხდა აგენტის ევაკუაცია და სად იმყოფება ახლა, ეს უცნობია. თეთრი სახლის პრესმდივანი სტეფან გრიშემი CNN-თან საუბარში ამბობს, რომ ტელეარხის ინფორმაცია სინამდვილეს არ შეესაბამება და შესაძლოა "საფრთხის ქვეშ აღმოჩნდეს ადამიანთა სიცოცხლე". CIA-ს წარმომადგენელი ბრიტანი ბრამელი კი უარყოფს ცნობას, რომ აგენტის რუსეთიდან გაყვანის მიზეზი შესაძლოა ტრამპი გამხდარიყო.