ბასკების სეპარატისტული მოძრაობის 47-მა წევრმა ბრალი აღიარა

ბასკების სეპარატისტული მოძრაობის (ETA) 47 წევრის წინააღმდეგ სასამართლო სხდომა 25 წუთი გაგრძელდა. The Guardian-ის ინფორმაციით, ბრალდებულებმა ბრალი აღიარეს და გამოძიებასთან საპროცესო შეთანხმება დადეს.

შეთანხმების თანახმად ბრალდებულთა უმეტესობას სასამართლო 2-წლიან პირობით სასჯელს გამოუტანს, ორი წევრი კი 5-თვიან რეალურ სასჯელს მოიხდის.

გამოძიების მტკიცებით, ბრალდებული ექიმები, იურისტები, ფსიქოლოგები და პოლიტიკური აქტივისტები ETA-ს საკოორდინაციო ქსელის წევრები იყვნენ და სხვადასხვა დანაშაულებთან ერთად, ტერორიზმსაც აფინანსებდნენ. დაცვის მხარე კი ამბობდა, რომ ბრალდებულები ბასკი პოლიტპატიმრების, მათ შორის წამების მსხვერპლთა უფლებებს იცავდნენ, გამოძიება კი ამას ტერორიზმის მხარდაჭერად აფასებდა.

ETA შეიარაღებული ბასკური ნაციონალისტური და სეპარატისტული ორგანიზაცია იყო. ჯგუფი 1959 წელს დაარსდა. იგი თავიდან სოციალურ მოძრაობას წარმოადგენდა და ანტიკოლონიური ხასიათის იყო. შემდეგში თავი მან მარქსისტულ–ლენინურ დაჯგუფებად გამოაცხადა, რომლის მიზანი არამარტო ბასკეთის მშენებლობა, არამედ სოციალიზმის მშენებლობაც იყო. მიზნის მისაღწევად მათ აირჩიეს ტაქტიკა: მოქმედება–რეპრესია–მოქმედება.

ETA-მ ცეცხლის შეწყვეტის შესახებ 2011 წელს განაცხადა, 2017 წლის აპრილში კი განიარაღების პროცესი დაიწყო. 2018 წელს ორგანიზაციამ ნახევარსაუკუნოვანი ძალადობრივი კამპანიის გამო მსხვერპლთა და მათი ახლობლების წინაშე ბოდიში მოიხადა.