ეპშტეინის მსხვერპლმა პრინც ენდრიუსთან სექსუალური ურთიერთობის დეტალები გაიხსენა

ჯეფრი ეპშტეინის მსხვერპლი ქალი, რომელიც დიდი ბრიტანეთის პრინც ენდრიუს მასთან სექსის აღიარებისკენ მოუწოდებდა, ამბობს, რომ პრინცს ის ეპშტეინმა მიუგზავნა. ამის შესახებ მან NBC News-ის ეთერში განაცხადა.

35 წლის ვირჯინია ჟუფრეს მტკიცებით, პრინცს ენდრიუსთან სექსი მას 17 წლისას ჰქონდა. მისივე თქმით, ეპშტეინმა მას რამდენიმე გავლენიან ადამიანთან, მათ შორის პრინც ენდრიუსთან სექსით დაკავება უბრძანა.

„ლონდონში ვიყავით, როდესაც დილით ​ეპშტეინის მეგობარმა გისლეინ მაქსველმა გამაღვიძა და მითხრა, რომ პრინცს უნდა შევხვედროდი. მან მითხრა, რომ პრინცთან ის უნდა გამეკეთებინა, რასაც ეპშტეინთან ვაკეთებდი. ამის შემდეგ წამიყვანეს ერთ-ერთ კლუბში, სადაც პრინცმა ალკოჰოლური სასმელი, სავარაუდოდ არაყი დამალევინა. პრინცისთვის ვიცეკვე, შემდეგ კი მე, გისლეინ მაქსველი და პრინცი ​მაქსველის სახლში გავემგზავრეთ. სექსუალური შევიწროება სააბაზანოში დაიწყო და საძინებელ ოთახში გაგრძელდა. ის უხეშად არ მექცეოდა, ბოლოს მადლობა გადამიხადა და წავიდა“, - განაცხადა ვირჯინია ჟუფრემ.

ქალის თქმით, მას ვერ წარმოედგინა, რომ ასეთ საქმეებში სამეფო ოჯახის წევრებიც იყვნენ ჩართულები. 

პრინცი ენდრიუ ვირჯინია ჟუფრეს ბრალდებებს უარყოფს.

66 წლის ჯეფრი ეპშტეინი არასრულწლოვანთა ტრეფიკინგისა და პროსტიტუციაში ჩაბმის ბრალდებით 7 ივლისს დააკავეს. გამოძიების მტკიცებით, ბრალდებულმა დანაშაული 2002 და 2005 წლებში ნიუ-იორკსა და ფლორიდაში ჩაიდინა. 10 აგვისტოს მილიარდერმა საკანში თავი მოიკლა. ეპშტეინის სიკვდილმა შეთქმულების თეორიები გააჩინა.