რუსეთისთვის ხმის მიცემის უფლების აღდგენას სტრასბურგში უკრაინელი დეპუტატებიც აპროტესტებენ

სტრასბურგში ევროპის საბჭოში რუსეთისთვის ხმის მიცემის უფლების აღდგენას ქართულ დელეგაციასთან ერთად უკრაინელი დეპუტატებიც აპროტესტებენ. ისინი საპარლამენტო ასამბლეის საშემოდგომო სესიის მუშაობაში მონაწილეობას არ მიიღებენ. მათი თქმით, რუსეთისთვის ხმის უფლების აღდგენა დიდი შეცდომა იყო.

„უკრაინის პარლამენტის პოზიცია ნათელია. ჩვენთვის მიუღებელი იყო და დღესაც მიუღებელია რუსი პარლამენტარების ევროსაბჭოში დაბრუნება. ვფიქრობთ, ეს დაუშვებელია და დიდი შეცდომა იყო. ჩვენ გადავწყვიტეთ, რომ ახალი დელეგაცია ამ სესიაზე არ გაგვეგზავნა. რაც შეეხება დელეგაციის ძველ შემადგენლობას, ისინი პლენარული სესიის მუშაობაში მონაწილეობას არ მიიღებენ. ძალაშია დილის სესიის ბოიკოტიც. ვინც მხარი დაუჭირა წინა სესიაზე რუსული დელეგაციის დაბრუნებას, მათ ჰქონდათ არგუმენტი, რომელიც ევროპულ სასამართლოს უკავშირდება. კერძოდ, ისინი ამბობდნენ, რომ რუსეთის 150 მილიონამდე მოქალაქე ევროპული სასამართლოს გარეშე რჩებოდა. ახლა უკრაინის 42 მილიონი მოქალაქე და მილიონობით სხვა ქვეყნის მოქალაქეც დარჩება ევროპული სასამართლოს გარეშე. ჩვენ ძალიან გვაინტერესებს, როგორი იქნება რეაქცია სხვა დელეგაციებიდან და როგორ შეაფასებენ არსებულ ვითარებას“, - ამბობს უკრაინელი დეპუტატი, იულია ტიმოშენკოს პარტია „ბატკივშინას“ წევრი სერგეი სობოლევი.

კიდევ ერთი უკრაინელი დეპუტატი, პეტრო პოროშენკოს პარტია „ევროპული სოლიდარობის“ წევრი ალექსეი გონჩარენკო აცხადებს, რომ  რუსეთისთვის ხმის უფლების დაბრუნებით ევროსაბჭოს საპარლამენტო ასამბლეამ და ზოგადად ევროსაბჭომ სანდოობა და გავლენა დაკარგა.

„დიდი მადლობა ქართულ დელეგაციას და საქართველოს მათი მტკიცე პოზიიცის გამო. ჩვენ საზეიმო ღონისძიებებში მონაწილეობას არ მივიღებთ. ეს არის ჩვენი პროტესტი. ჩვენ არ დაგვვიწყებია, რაც რუსეთმა გააკეთა საქართველოში და შემდეგ უკრაინაში. ჩვენ მოვითხოვეთ შეხვედრა ფრანგულ მხარესთანაც. რას ნიშნავს ჩვენთვის რუსეთის დაბრუნება? ეს ნიშნავს, რომ ევროსაბჭოს საპარლამენტო ასამბლეამ და ზოგადად ამ ორგანიზაციამ დაკარგა სანდოობა, გავლენა და რაც ყველაზე სამწუხაროა, ეს იყო და არის რუსეთის ინტერესებში. მათთვის იმდენად მნიშვნელოვანი არაა აქ ყოფნა, როგორც ამ ორგანიზაციის დანგრევა. ეს ორგანიზაცია კარგავს ღირებულებებს, სახელს, ფუნქციას და მისგან არაფერი რჩება. ჩვენ წინააღმდეგობა უნდა გავუწიოთ ამ პროცესს“, - აცხადებს გონჩარენკო.

სტრასბურგში ევროპის საბჭოს საპარლამენტო ასამბლეის საშემოდგომო სესია დღეს იხსნება, სადაც საქართველოს წარმომადგენლები რუსეთისთვის ხმის მიცემის უფლების აღდგენას აპროტესტებენ.

ევროსაბჭოში რუსეთს ხმის უფლება 2014 წლიდან, ყირიმის ანექსიის გამო ჰქონდა ჩამორთმეული. ჩამორთმეული უფლების გამო, რუსეთი წლების განმავლობაში ევროსაბჭოში საწევროს გადასახადსაც კი არ იხდიდა.

ევროპის საბჭოს საპარლამენტო ასამბლეამ კი მიმდინარე წლის 26 ივნისს რუსეთის დელეგაციის უფლებამოსილება აღიარა. კენჭისყრის შედეგების თანახმად, რომელსაც 116 მომხრე და 16 წინააღმდეგი ჰყავდა,  რუსეთის სათათბიროს წევრები საპარლამენტო ასამბლეაზე სრულფასოვან მუშაობას დაუბრუნდნენ. დელეგაცია ასევე მონიტორინგის და ასამბლეის სხვა კომიტეტების მუშაობაში ჩაერთო.

უკრაინელი კანონმდებლები დებატებზე კოლეგებს მოუწოდებდნენ, გაეთვალისწინებინათ უკრაინაში არსებული ვითარება, დესტაბილიზაცია აღმოსავლეთ უკრაინის ტერიტორიაზე, ყირიმის ანექსია, მოლდოვასა და საქართველოს მიმართ რუსეთის პოლიტიკა, თუმცა ასამბლეამ რუსეთის დელეგაციის უფლებამოსილება აღიარა.