დემოკრატებმა ტრამპი-ზელენსკის საუბრის დოკუმენტაცია გამოითხოვეს

დემოკრატმა კონგრესმენებმა აშშ-ის პრეზიდენტის ადმინისტრაციიდან ტრამპი-ზელენსკის სატელეფონო საუბართან დაკავშირებული დოკუმენტები გამოითხოვეს. შესაბამისი მოთხოვნა დონალდ ტრამპის იმპიჩმენტის პროცედურას უკავშირდება. ინფორმაციას ამის შესახებ BBC ავრცელებს.

კონგრესმენებმა თეთრ სახლს დოკუმენტების გადასაცემად ვადა 18 ოქტომბრამდე მისცეს, რის შემდეგაც დოკუმენტაციის გადაცემაზე უარის თქმა გამოძიებისთვის ხელის შეშლად იქნება შეფასებული.

„ვწუხვართ, რომ პრეზიდენტმა ტრამპმა ჩვენ და მთელი ერი ამ მდგომარეობაში ჩაგვაყენა, მაგრამ მისმა ქმედებებმა სხვა გამოსავალი არ დაგვიტოვეს“, - ნათქვამია კონგრესმენების მიმართვაში.

„დემოკრატები თეთრ სახლს ვადას 18 ოქტომბრამდე აძლევენ. „ძალიან ვწუხვართ, რომ დონალდ ტრამპმა ჩვენ და მთელი ჩვენი ერი ამ მდგომარეობაში ჩაგვაყენა. მისმა ნაბიჯებმა სხვა გზა აღარ დაგვიტოვა“, - აცხადებენ დემოკრატები წერილში, რომელიც თეთრ სახლს გაუგზავნეს.

თუ წარმომადგენელთა პალატა იმპიჩმენტს მხარს დაუჭერს, სასამართლო პროცესი აშშ-ის სენატში გაიმართება.

აშშ-ის დაზვერვის თანამშრომელმა დონალდ ტრამპის წინააღმდეგ საჩივარი დაწერა, რომელიც მისი და ერთ-ერთი უცხოელი ლიდერის საუბარს ეხებოდა. მოგვიანებით აღმოჩნდა, რომ ეს ლიდერი უკრაინის პრეზიდენტი ვოლოდიმირ ზელენსკი იყო.

ჩანაწერის თანახმად, ტრამპმა სატელეფონო საუბრის დროს აშშ-ის ყოფილი ვიცეპრეზიდენტის, ჯო ბაიდენისა და მისი შვილის საკითხი განიხილა. აშშ-ის კონგრესის დემოკრატმა წევრებმა კი გამოთქვეს ვარაუდი, რომ კორუფციასთან ბრძოლის საფარქვეშ ტრამპი უკრაინის ხელისუფლებას თავისი ოპონენტების წინააღმდეგ სისხლის სამართლებრივი დევნის დაწყებას აიძულებდა.

ამის შემდეგ თეთრმა სახლმა პრეზიდენტ დონალდ ტრამპსა და უკრაინის ლიდერ ვოლოდიმირ ზელენსკის შორის 25 სექტემბერს შემდგარი სატელეფონო საუბრის სტენოგრამა (.pdf) გამოქვეყნა. მანამდე კი თავად ზელენსკიმაც დაადასტურა, რომ სატელეფონო საუბრისას ტრამპი მას ბაიდენზე ზემოქმედებისკენ არ უბიძგებდა.

მიუხედავად ამისა, აშშ-ის წარმომადგენელთა პალატის ნაწილმა დონალდ ტრამპის წინააღმდეგ იმპიჩმენტის ფორმალური პროცედურა დაიწყო. აშშ-ის წარმომადგენელთა პალატის გადაწყვეტილებას იმპიჩმენტის შესახებ ამერიკელების 47% მხარს უჭერს.