სირიაში თურქეთის სამხედრო ოპერაციაში აშშ მონაწილეობას არ მიიღებს

სირიაში თურქეთის სამხედრო ოპერაციაში აშშ მონაწილეობას არ მიიღებს, შესაბამისად რეგიონში ბოლო 2 წლის განმავლობაში დაკავებული „ისლამური სახელმწიფოს“ მებრძოლების ბედზე პასუხისმგებლობას თურქეთი აიღებს. ამის შესახებ ნათქვამია დონალდ ტრამპისა და რეჯეფ თაიფ ერდოღანის სატელეფონო საუბრის შემდეგ თეთრი სახლის მიერ გავრცელებული განცხადებაში, იუწყება BBC.

განცხადებაში აღნიშნულია, რომ ევროპის ქვეყნებმა უარი თქვეს „ისლამური სახელმწიფოს“ წევრი საკუთარი მოქალაქეების ექსტრადირებაზე.

„აშშ მოითხოვდა გერმანიისგან, საფრანგეთისგან და სხვა ევროპული ქვეყნებისგან, რომ მათ ტერორისტები წაეყვანათ, თუმცა უარი მიიღო. აშშ არ აპირებს, არჩინოს „ისლამური სახელმწიფოს“ წევრები გაურკვეველი დროის განმავლობაში, რაც ამერიკელ გადასახადების გადამხდელებს დიდ ტვირთად დააწვებოდა. დღეიდან ამ ტერორისტებზე პასუხისმგებლობას თურქეთი აიღებს“, - ნათქვამია განცხადებაში.

6 ოქტომბერს თურქეთმა სირიის საზღვართან დამატებითი ძალები და სამხედრო ტექნიკა გაგზავნა. მანამდე თურქეთის პრეზიდენტმა განაცხადა, რომ მისი ქვეყანა მზად არის, უახლოეს დღეებში სირიაში ანტიტერორისტული ოპერაცია დაიწყოს.