AP: ტრამპის მოკავშირეები უკრაინული „ნატფოგაზის“ ხელმძღვანელობის შეცვლა სცადეს

ამერიკელი ბიზნესმენების ჯგუფი და აშშ-ის რესპუბლიკური პარტიის დონორები უკრაინული კომპანია "ნაფტოგაზის" ხელმძღვანელობის შეცვლას ცდილობდნენ. ამის შესახებ ინფორმაციას Associated Press-ი წყაროებზე დაყრდნობით ავრცელებს. 

როგორც AP წერს, მათ "ნაფტოგაზის" ხელმძღვანელობის შეცვლა იმიტომ სურდათ, რომ შემდგომში უკრაინულ კომპანიას მომგებიანი კონტრაქტები ტრამპის მოკავშირეების ფირმებთან გაეფორმებინა. სააგენტოს ინფორმაციით, ამაში მონაწილეობდნენ ყოფილ საბჭოთა კავშირის ქვეყნებში დაბადებული და ფლორიდაში მცხოვრები ბიზნესმენები ლევ პარნასი და იგორ ფრუმანი, ასევე ნავთობმაგნატი ფლორიდიდან ჰარი სარჟიანტ მესამე. AP-ი წერს, რომ ამ სამივე ადამიანს კავშირები აქვს პრეზიდენტ დონალდ ტრამპთან და მის პირად ადვოკატთან რუდი ჯულიანთან.

ამერიკელი ბიზნესმენების გეგმა ჩავარდა მას შემდეგ, რაც პოროშენკო ზელენსკისთან არჩევნებში დამარცხდა. როგორც AP-ი წერს, ამ საქმესთან დაკავშირებით შეხვედრა აშშ-ის ენერგეტიკის მინისტრთან რიკ პერისთანაც გაიმართა, რომელიც მაისში კიევში ინაუგურაციაზე ოფიციალური ვიზიტით იყო ჩასული. 

25 სექტემბერს აშშ-ის წარმომადგენელთა პალატის ნაწილმა დონალდ ტრამპის წინააღმდეგ იმპიჩმენტის ფორმალური პროცედურა დაიწყო. ამის მიზეზი ტრამპსა და უკრაინის პრეზიდენტ ვოლოდიმირ ზელენსკის შორის შემდგარი სატელეფონო საუბარი გახდა, რომელშიც თეთრი სახლის მეთაური კოლეგას აშშ-ის ყოფილი ვიცეპრეზიდენტის, ჯო ბაიდენის ვაჟის უკრაინაში საქმიანობის გამოძიებას სთხოვა. დემოკრატი ჯო ბაიდენი 2020 წლის საპრეზიდენტო არჩევნებში ტრამპის ერთ-ერთ მთავარ კონკურენტად ითვლება.