კვლევა: რომელია ყველაზე გულუხვი ერი

მსოფლიოში ჩატარებულმა მასშტაბურმა კვლევამ მოულოდნელი შედეგი დადო იმასთან დაკავშირებით, თუ რომელი ქვეყნის მცხოვრებლები არიან მზად სხვას დაეხმარონ ან ფული მისცენ. ამის შესახებ ინფორმაციას Die Welt-ი ავრცელებს.

მასშტაბური ანალიზი საქველმოქმედო ფონდმა Charities Aid Foundation (CAF) ჩაატარა. 10-წლიანი კვლევის განმავლობაში 126 ქვეყანაში 1.3 მილიონამდე ადამიანი გამოკითხეს. კითხვები შეეხებოდა თუ რა თანხას ხარჯავენ საქველმოქმედო მიზნებისთვის, რამდენად ხშირად ეხმარებიან გასაჭირში მყოფ უცნობებს და რამდენად არიან ჩართულები მოხალისეობრივ საქმიანობაში.

კვლევის მიხედვით, პირველ ადგილზე ამერიკელები არიან. ისინი სამივე პუნქტში ლიდერობენ. ამასთან, საინტერესოა რომ ამერიკელების შემდეგ, მეორე ადგილს მიანმარი იკავებს, ასევე რეიტინგში მეცხრე და მეათე ადგილებზე ღარიბი ქვეყნები არიან: შრი-ლანკა და ინდონეზია. პირველი ათეული კი ასე გამოიყურება:

1. აშშ

2. მიანმარი

3. ახალი ზელანდია

4. ავსტრალია

5. ირლანდია

6. კანადა

7. დიდი ბრიტანეთი

8. ნიდერლანდები

9. შრი-ლანკა

10. ინდონეზია.

CAF-ი ამ ქვეყნებში დახმარებაზე ადამიანების მზადყოფნას რელიგიური მიზეზებით ხსნის. რეიტინგში ბოლო ადგილს სამივე პუნქტის მიხედვით ჩინეთი იკავებს, მიუხედავად იმისა, რომ ბოლო ათწლეულების განმავლობაში ქვეყნის ეკონომიკური დონე სწრაფად იზრდება. 

სპეციალისტებს განსაკუთრებით თვალში მოხვდათ აფრიკული ქვეყნები, სადაც პუნქტ "უცნობი ადამიანების დახმარებაზე მზადყოფნის" მხრივ მათ პირველი ადგილი დაიკავეს: ლიბერია პირველ ადგილზეა, სიერა-ლიონე მეორეზე. ამ პუნქტის მიხედვით ქვეყნების პირველ ათეულში ასევე არიან: კენია, ზამბია, უგანდა, ნიგერია და მალავი. 

რაც შეეხება საქართველოს, ის ყველა პუნქტის გათვალისწინებით შედგენილ რეიტინგში 118-ე ადგილზეა. უცხო ადამიანის დახმარების მზადყოფნის კუთხით, საქართველო 90-ე ადგილზეა.