სოჭის შეთანხმების შეუსრულებლობის შემთხვევაში თურქეთი სირიაში ოპერაციას განაგრძობს

თუ რუსეთი სირიის სასაზღვრო ტერიტორიიდან ქურთი მებრძოლების გასვლას არ უზრუნველყოფს, თურქეთი ამას თავად იზამს. შესაბამისი განცხადება რეჯეფ თაიფ ერდოღანმა გააკეთა. მის სიტყვებს Reuters-ი ავრცელებს. 

„თუ ეს ზონა 150 საათში ტერორისტებისგან არ გათავისუფლდება, მაშინ სიტუაციას ჩვენი ძალებით გავუმკლავდებით და წმენდას ჩავატარებთ“, - განაცხადა ერდოღანმა. 

ამასთან, სტამბოლში სიტყვით გამოსვლისას ერდოღანმა ევროკავშირი ტყუილში დაადანაშაულა. მისი თქმით, ბრიუსელი ანკარას 3.6 მილიონი სირიელი ლტოლვილის დასახმარებლად 6 მილიარდ ევროს დაპირდა, თუმცა მხოლოდ თანხის ნახევარი გადაურიცხა. თურქეთმა კი ლტოლვილების დასახმარებლად 40 მილიარდი დახარჯა. 

„თუ ლტოლვილების დაბრუნების გეგმას არავინ დაუჭერს მხარს, ჩვენ არჩევანი არ გვექნება და საზღვრებს გავხსნით, რომ ლტოლვილებმა ევროპაში გადასვლა შეძლონ“, - თქვა ერდოღანმა. 

თურქეთის და რუსეთის პრეზიდენტების მიერ სოჭში მიღწეული შეთანხმების თანახმად, რუსეთმა სირიის და თურქეთის საზღვრიდან 30-კილომეტრიანი ზონიდან ქურთი მებრძოლების გასვლა უნდა უზრუნველყოს. ამისთვის რუსული შენაერთები სირიის ტერიტორიაზე 23 ოქტომბერს შევიდა, 29 ოქტომბრიდან კი რუსეთი და თურქეთი სირიის ტერიტორიის 10-კილომეტრიან მონაკვეთს ერთად გააკონტროლებენ. 

9 ოქტომბერს თურქეთმა სირიაში ოპერაცია „მშვიდობის წყარო“ დაიწყო, თუმცა, ერდოღანის აშშ-ის ვიცეპრეზიდენტთან და სახელმწიფო მდივანთან შეხვედრის შემდეგ თურქეთმა ოპერაცია დროებით შეწყვიტა.