ამერიკულ მედიაში ალ-ბაღდადის სავარაუდო შემცვლელი დაასახელეს

ამერიკულ მედიაში აბუ ბაქრ ალ-ბაღდადის შემცვლელი დაასახელეს. როგორც გამოცემა Newsweek-ი ახლო აღმოსავლეთის ერთ-ერთი ქვეყნის დაზვერვის თანამშრომელზე დაყრდნობით წერს, ალ-ბაღდადის ლიკვიდაციის შემდეგ „ისლამური სახელმწიფოს“ ლიდერობა აბდულა ქარდაშმა ითავა.

The Washington Post-ის ცნობით, ალ-ბაღდადის შემცვლელის პოსტზე ექვსი კანდიდატი განიხილება, თუმცა მათგან მხოლოდ ერთის ვინაობაა ცნობილი და ეს სწორედ აბდულა ქარდაშია.

აბდულა ქარდაში, იგივე ჰაჯი აბდულა ალ-აფარი, ყოფილი ოფიცერია, რომელიც შეიარაღებულ ძალებში სადამ ჰუსეინის მმართველობის დროს მსახურობდა. ქარდაში ერაყის ქალაქ ტალ-აფარში დაიბადა და 2003 წელს ამერიკელ სამხედროებს ალ-ბაღდადისთან ერთად ბუქას ციხეში ჰყავდა დატყვევებული, სადაც მისი ერთ-ერთი უახლოესი თანამოაზრე გახდა.

ამასთან ერთად, Newsweek-ის ცნობით, ბოლო დროს „ისლამური სახელმწიფოს“ ლიდერის თანამდებობა სიმბოლური გახდა, ვინაიდან, ალ-ბაღდადი ორგანიზაციის საქმეებში თითქმის აღარ მონაწილეობდა.

27 ოქტომბერს აშშ-ის პრეზიდენტმა, დონალდ ტრამპმა დაადასტურა, რომ „ისლამური სახელმწიფოს“ ლიდერი ალ-ბაღდადი ჩრდილოეთ სირიაში სამხედრო ოპერაციისას მოკლეს. თეთრ სახლში გამართულ პრესკონფერენციაზე ამერიკის პრეზიდენტმა თქვა, რომ ალ-ბაღდადიმ თავი აიფეთქა და შედეგად თავისი სამი შვილიც მოკლა.

ვინ იყო სირიაში მოკლული აბუ ბაქრ ალ-ბაღდადი, შეგიძლიათ წაიკითხოთ ამ ბმულზე.