ტეხასის სასამართლომ მკვლელობისთვის მსჯავრდებულის სიკვდილით დასჯა გადადო

ტეხასის სასამართლომ მკვლელობისთვის მსჯავრდებულის როდნი რიდის სიკვდილით დასჯა გადადო, მას შემდეგ რაც საქმეს საზოგადოების მხრიდან რეზონანსი მოყვა და მსჯავრდებულს ცნობილმა ადამიანებმა დაუჭირეს მხარი. ამის შესახებ BBC წერს.

სიკვდილით დასჯა როდნი რიდს 1996 წელს 19 წლის სტეისი სტაიტსის მკვლელობისთვის მიუსაჯეს. 51 წლის როდნი რიდი სიკვდილით დასჯას 21 წლის განმავლობაში ელოდებოდა. მის მიმართ გამოტანილი განაჩენი 20 ნოემბერს უნდა აღსრულებულიყო. ტეხასის შეწყალებისა და ვადამდე გათავისუფლების საბჭოს კომისიამ განაჩენის აღსრულების 120 დღით გადადება მოითხოვა, შტატის სააპელაციო სასამართლომ კი საქმე პირველი ინსტანციის სასამართლოში დააბრუნა და განაცხადა, რომ საჭიროა იმ თვითმხილველთა მოსმენაც, რომლებიც მკვლელობაში სტაიტსის საქმროს ადანაშაულებენ.

როდნი რიდის სიკვდილით დასჯის გაუქმების მოთხოვნით პეტიციას ხელი 2,9 მილიონმა ადამიანმა მოაწერა, მათ შორის იყვნენ რიანა, ჯიჯი ჰადიდი და კიმ კარდაშიანი. გარდა ამისა, განაჩენის აღსრულების გადავადებას მხარს უჭერენ 8 რესპუბლიკელი და 8 დემოკრატი სენატორი, რომლებმაც შესაბამისი თხოვნით შტატის გუბერნატორს გრეგ ებოტს მიმართეს. რიდის ადვოკატების თქმით, გამომძიებლებმა დანაშაულის ჩადენის ვადების დადგენისას შეცდომები დაუშვეს.

19 წლის სტეისი სტაიტსი 1996 წლის 23 აპრილს ქამრით გაგუდული იპოვეს. გამომძიებლებმა მის სხეულში როდნი რიდის დნმ-ის კვალი აღმოაჩინეს, თუმცა რიდი ამტკიცებდა, რომ სტეისი სტაიტსთან ფარული სექსუალური ურთიერთობა ჰქონდა. სტეისი სტატსის ავტომობილზე და ქამარზე, რომლითაც ახალგაზრდა ქალი გაგუდეს, რიდის დნმ-ის კვალი არ უპოვიათ.

ამასთან ერთად, სტეისი სტაიტსი ყოფილ პოლიციელზე, ჯიმი ფენელზე იყო დანიშნული და მასთან დაქორწინებას გეგმავდა. რამდენიმე მოწმის მტკიცებით, ჯიმი ფენელი ძალიან ეჭვიანი იყო და არაერთხელ უთქვამს, რომ ღალატის შემთხვევაში სტეისის გაგუდავდა. კიდევ ერთი ყოფილი პოლიციელის განცხადებით, სტეისის დაკრძალვის დროს ჯიმი ფენელმა თქვა, რომ მისმა საცოლემ მიიღო ის, რასაც იმსახურებდა.

სტეისი სტაიტსის გარდაცვალების შემდეგ ჯიმი ფენელი სხვა ქალის გატაცებისა და გაუპატიურებისთვის დააკავეს. ის საპატიმროდან 2018 წელს გათავისუფლდა. მისი ერთ-ერთი თანასაკნელის თქმით, ჯიმი ფენელი ამბობდა, რომ საცოლე მას ფერადკანიან კაცთან ღალატობდა.