პრინც ენდრიუს ინტერვიუს ექსპერტებმა და პრესამ კატასტროფა უწოდეს

იორკის ჰერცოგმა და დიდი ბრიტანეთის დედოფლის მესამე შვილმა, პრინცმა ენდრიუმ BBC-ის ინტერვიუ მისცა, რომელშიც მან ამერიკელ მილიარდერ ჯეფრი ეპშტეინთან ურთიერთობაზე ილაპარაკა. 66 წლის ეპშტეინმა ნიუ-იორკის ციხეში თავი მოიკლა მას შემდეგ, რაც ის სექსუალური ექსპლუატაციის მიზნით ადამიანებით ვაჭრობაში დაადანაშაულეს.

პრინცს პირველად მოუწია პასუხის გაცემა ამერიკელი ვირჯინია ჯუფეს ბრალდებებზე, რომელიც ამტკიცებდა, რომ არასრულწლოვანი იყო, როდესაც ეპშტეინის ბრძანებით პრინცთან სექსი ჰქონდა. იორკის ჰერცოგმა ბრალდებები კატეგორიულად უარყო და თქვა, რომ ამ ქალს არასდროს შეხვედრია, თუმცა ეპშტეინთან მეგობრობის გამო განსაკუთრებული სინანული არ გამოუთქვამს.

მან თქვა, რომ არ ნანობს ეპშტეინთან მეგობრობის ფაქტს იმიტომ, რომ ამ მეგობრობამ მას ვაჭრობასა და ბიზნესის ცოდნის თვალსაზრისით ბევრი შესაძლებლობა მისცა. თუმცა პრინცმა თავის შეცდომად აღიარა 2010 წლის ვიზიტი ეპშტეინთან, როდესაც მას მსგავსი ბრალდებით ერთხელ უკვე გასამართლებულ ბიზნესმენთან ერთად ფოტო გადაუღეს.

„ვნანობ თუ არა მე, რომ ის [ეპშტეინი] შეუფერებლად იქცეოდა? დიახ, - დაასკვნა პრინცმა. რაზეც ჟურნალისტმა ემილი მეიტლისმა მას ხელახლა ჰკითხა: „შეუფერებლად? ის სექსუალური დამნაშავე იყო“. „დიახ, მაპატიეთ, შევეცადე კორექტულად გამომეთქვა მოსაზრება, რომ ის სექსუალური დამნაშავე იყო“, - განაცხადა იორკის ჰერცოგმა.

ინტერვიუ მკაცრად გააკრიტიკეს აშშ-სა და დიდ ბრიტანეთში. მისი გამოქვეყნების შემდეგ ექსპერტებმა და პრესამ, მათ შორის თავად BBC-ის თანამშრომლებმა ის პრინცის და სამეფო ოჯახის იმიჯისთვის კატასტროფად შეაფასეს. დაიწერა, რომ ინტერვიუ პრინცის სახელის და რეპუტაციის გადარჩენის შესაძლებლობა იყო, მაგრამ ის ჩავარდა, რომ იორკის ჰერცოგს სინანული არ გამოუხატავს და თავს არაფერში გრძნობს დამნაშავედ. 

„ამ ყველაფრის ყველაზე მნიშვნელოვანი მხარე - მსხვერლია და მათ შესახებ ამ ინტერვიუში თითქმის არაფერი თქმულა. ისინი სრულად უგულებელყვეს“, - უთხრა The Guardian-ს გლორია ალრედმა, რომელიც აშშ-ში ეპშტეინის 5 სავარაუდო მსხვერპლის წარმოადგენელია. მან დასძინა, რომ პრინცისთვის საუკეთესო გამოსავალია ჩვენება მისცეს FBI-სა და ნიუ-იორკის სამხრეთ ოლქის პროკურატურას, რომლებიც ეპშტეინის საქმის გამოძიებას განაგრძობენ. სხვა ხუთი შესაძლო მსხვერპლის ადვოკატმა ლიზა ბლუმმა კი იმავე გამოცემას განუცხადა, რომ ინტერვიუმ მას ძალიან გაუცრუა იმედი: „მას აქვს ბრალდებების უარყოფის და თავდაცვის უფლება. მაგრამ სად არის მისი ბოდიში იმის გამო, რომ ასე მჭიდროდ იყო დაკავშირებული ისტორიის ერთ-ერთ ყველაზე წარმატებულ პედოფილთან?“