ფხენიანმა „ძალიან მნიშვნელოვანი“ ტესტირების ჩატარების შესახებ განაცხადა

ჩრდილოეთ კორეამ ძალიან მნიშვნელოვანი ტესტირების ჩატარების შესახებ განაცხადა. ამის შესახებ BBC წერს. 

გამოცემის ინფორმაციით, ფხენიანში არ აკონკრეტებენ რა სახის ტესტირებაზეა საუბარი, თუმცა ექსპერტები ვარაუდობენ, რომ ეს რაკეტის გაშვება კი არა, რაკეტის ძრავის გამოცდა იყო. 

„7 დეკემბერს, დღის მეორე ნახევარში სოჰეს კოსმოდრომზე ძალიან მნიშვნელოვანი ტესტირება ჩატარდა. ჩრდილოეთ კორეის ეროვნული თავდაცვის აკადემიამ კორეის შრომის პარტიას წარმატებული შედეგის შესახებ შეატყობინა, რომელსაც ძალიან მალე დიდი გავლენა ექნება ჩრდილოეთ კორეის სტრატეგიული მდგომარეობის შეცვლაზე“, - ნათქვამია ცენტრალური სატელეგრაფო სააგენტოს განცხადებაში. 

სხვა დეტალები უცნობია. განცხადება მას შემდეგ გავრცელდა, რაც გაეროში ფხენიანის მუდმივმა წარმომადგენელმა კიმ სონმა განაცხადა, რომ ჩრდილოეთ კორეას დენუკლეარიზაცია აღარ აინტერესებს. 

ფხენიანმა აშშ-ს დენუკლეარიზაციის შესახებ შეთანხმების მისაღწევად ვადა წლის ბოლომდე მისცა. წინააღმდეგ შემთხვევაში ალტერნატიული გზის არჩევის პირობა დადო.

აშშ-ის და გაეროს სანქციების მიუხედავად, ფხენიანმა ბალისტიკური რაკეტების გამოცდა განაახლა, ამ კვირაში კი ოფიციალურმა ფხენიამა ბოლო წლის განმავლობაშ პირველად აშშ-ის პრეზიდენტი დონალდ ტრამპი ნეგატიურად მოიხსენია. თუმცა ტრამპმა დღესვე განაცხადა, რომ შეთანხმების მიღწევის იმედი მაინც აქვს. 

ჩრდილოეთ კორეასა და აშშ-ს შორის დენუკლეარიზაციის შესახებ ბოლო შეხვედრა 5 ოქტომბერს შედგა. ეს პირველი სამუშაო შეხვედრა იყო ტრამპის და კიმ ჩენ ინის ვიეტნამის წარუმატებელი სამიტის შემდეგ.