პალესტინა და „ჰამასი“ ტრამპის ინიციატივას მხარს არ დაუჭერენ

პალესტინის ლიდერი მაჰმუდ აბასი და მოძრაობა „ჰამასის“ პოლიტბიუროს ხელმძღვანელი ისმაილ ჰანია აშშ-ის პრეზიდენტის, დონალდ ტრამპის მიერ შემოთავაზებულ „საუკუნის შეთანხმებას“ მხარს არ დაუჭერენ. ინფორმაციას ამის შესახებ სააგენტო Anadolu ავრცელებს.

მას შემდეგ რაც ტრამპმა და ისრაელის პრემიერმინისტრმა ბენიამინ ნეთანიაჰუმ ისრაელი-პალესტინის კონფლიქტის დარეგულირების გეგმა წარადგინეს, აბასმა და ჰანიამ სატელეფონო საუბარი გამართეს და შეთანხმდნენ, რომ ტრამპის ინიციატივას ყველა დონეზე მაქსიმალურ წინააღმდეგობას გაუწევენ.

„ჩვენი პოზიცია უცვლელია: არ ვიზიარებთ ე.წ. საუკუნის შეთანხმებას და ყველა მიმართულებით მის რეალიზებას შევეწინააღმდეგებით“, - განაცხადა მაჰმუდ აბასმა.

რაც შეეხება „ჰამასს“, მოძრაობის ოფიციალური წარმომადგენლის, სამი აბუ ზუჰრის განცხადებით, დონალდ ტრამპის გეგმა იმაზე უფრო ნაკლები ღირს, ვიდრე ის მელანი, რომლითაც ისაა დაწერილი.

დღეს დონალდ ტრამპი გამოვიდა ე.წ. საუკუნის შეთანხმების ინიციატივითა, რომელიც პალესტინის სახელმწიფოს შექმნას ითვალისწინებს. ინიციატივის თანახმად, იერუსალიმი ისრაელის განუყოფელ ნაწილად დარჩება, პალესტინის დედაქალაქი კი აღმოსავლეთ იერუსალიმი იქნება. „საუკუნის შეთანხმებას“ უკვე დაუჭირა მხარი ისრაელის პრემიერმინისტრმა ბენიამინ ნეთანიაჰუმ.