აშშ-ში „სუპერ სამშაბათი“ დაიწყო

აშშ-ის 14 შტატში ე.წ. სუპერ სამშაბათი დაიწყო. დღის მთავარი მოვლენა „დემოკრატიული პარტიის“ პრაიმერია, რომელზეც ირჩევენ 1375 დელეგატს, ისინი კი თავის მხრივ ივლისში, „დემოკრატიული პარტიის“ ყრილობაზე საპრეზიდენტო კანდიდატს აირჩევენ.

სულ „დემოკრატიული პარტიის“ ყრილობისთვის 3979 დელეგატი იქნება არჩეული. ამას დაემატება 771 ე.წ. „სუპერ დელეგატი“, რომლებსაც არ ირჩევენ. როგორც წესი, „სუპერ დელეგატების“ რიგებში შედიან კონგრესის წევრები, გუბერნატორები, ყოფილი პრეზიდენტები, პარტიის ლიდერები და ა.შ.

აშშ-ში „სუპერ სამშაბათი“ უკვე 40 წლის განმავლობაში ტარდება. ტრადიციულად, ის თებერვლის ან მარტის პირველ სამშაბათს იმართება. ამ ღონისძიებას დიდი მნიშვნელობა აქვს, რადგან საპრეზიდენტო კამპანიის ყველაზე ძლიერი კანდიდატების შერჩევა ხდება.

„სუპერ სამშაბათის“ ისტორიაში რეკორდი 2008 წელს დაფიქსირდა, როდესაც ის ერთდროულად 24 შტატში გაიმართა. იმის გამო, რომ 2020 წლის საპრეზიდენტო არჩევნებზე „რესპუბლიკურ პარტიაში“ დონალდ ტრამპს კონკურენტები არ ჰყავს, მთელი ყურადღება წელს „დემოკრატიული პარტიის“ პრაიმერისადმი იქნება მიპყრობილი.

რამდენიმე დღის წინ „დემოკრატიული პარტიის“ საპრეზიდენტო კანდიდატობის ორმა პრეტენდენტმა, პიტ ბუტიჯიგმა და ემი კლობუშარმა საპრეზიდენტო კამპანიიდან გამოსვლის შესახებ განაცხადეს და მხარი ყოფილ ვიცე-პრეზიდენტს, ჯო ბაიდენს დაუჭირეს.

„დემოკრატიული პარტიის“ რიგებში მთავარი ბრძოლა დღეს ოთხ კანდიდატს, ჯო ბაიდენს, ბერნი სანდერსს, ელიზაბეტ უორენსა და მაიკლ ბლუმბერგს შორის გაიმართება.