ემანუელ მაკრონისა და ვლადიმერ პუტინის შეხვედრა დაიწყო

ვერსალის სასახლეში საფრანგეთის ახლადარჩეული პრეზიდენტის ემანუელ მაკრონისა და რუსეთის პრეზიდენტის ვლადიმერ პუტინის შეხვედრა დაიწყო.

მაკრონის გაპრეზიდენტების შემდეგ, ეს პუტინის პირველი ვიზიტია საფრანგეთში. ინფორმაციას BBC ავრცელებს.

გამოცემა წერს, რომ ეს შეხვედრა დაძაბული იქნება, ვინაიდან ცოტა ხნის წინ მაკრონმა რუსეთი კიბერთავდასხმებში დაადანაშაულა. 

დიდი შვიდეულის სამიტზე, რომელიც სიცილიაზე რამდენიმე დღის წინ გაიმართა, მაკრონმა განაცხადა:

"რუსეთთან ლაპარაკი აუცილებელია იმიტომ, რომ არსებობს მთელი რიგი საერთაშორისო საკითხებისა, რომლებიც რუსეთთან მკაცრი დიალოგის გარეშე არ მოგვარდება", - თქვა საფრანგეთის პრეზიდენტმა.

საერთაშორისო საკითხებთან დაკავშირებით BBC გამოყოფს რუსეთისა და ირანის მიერ სირიაში ბაშარ ასადის რეჟიმის სამხედრო მხარდაჭერას და უკრაინაში რუსეთის ინტერვენციას. 2014 წელს, ყირიმში განვითარებული მოვლენების დროს საფრანგეთმა მკვეთრად უარყოფითი შეფასება მისცა რუსეთის ქმედებებს.

გარდა ამისა, შეხვედრა საინტერესო იქნება იმითაც, რომ საფრანგეთის საპრეზიდენტო არჩევნების დროს, ვლადიმერ პუტინი გამოხატულად უჭერდა მხარს მაკრონის მთავარ ოპონენტს მარინ ლე პენს - პუტინმა ლე პენი არჩევნებამდე ცოტა ხნით ადრე მოსკოვში ოფიციალური ვიზიტითაც კი მიიღო. ამასთან, წინასაარჩევნო პერიდში, ლე პენის პარტიამ რუსული ბანკებისგან მრავალრიცხოვანი ფულადი სესხი მიიღო.

ვლადიმერ პუტინის პრესსპიკერის იური უშაკოვის ცნობით, ორი ქვეყნის პრეზიდენტებს შორის ლაპარაკი შეეხება სირიასა და ანტიტერორისტულ ოპერაციებს, უკრაინაში კონფლიქტის დარეგულირებასა და სავაჭრო-ეკონომიკურ ურთიერთობებს. 

ამასთან, პუტინის ვიზიტი ვერსალში ემთხვევა რუსეთის იმპერატორის პეტრე პირველის საფრანგეთში განხორციელებულ პირველ ვიზიტს, რომელიც 300 წლის წინ გაიმართა.