უკრაინის გენერალურ პროკურორს გადასცეს აუდიოჩანაწერები, რომლებზეც სავარაუდოდ პეტრო პოროშენკოს და ჯო ბაიდენის საუბარია აღბეჭდილი

უკრაინის უზენაესი რადის დეპუტატმა ანდრეი დერკაჩმა გამოაქვეყნა რამდენიმე სატელეფონო საუბარი, რომელთა მონაწილეთა ხმები უკრაინის ყოფილი პრეზიდენტის, პეტრო პოროშენოკოს და აშშ-ის ყოფილი ვიცე-პრეზიდენტის, ჯო ბაიდენის ხმებს ჰგავს. ამის შესახებ Deutsche Welle წერს.

გამოცემის ინფორმაციით, დერკაჩი ამტკიცებს, რომ ჩანაწერები „საერთაშორისო კორუფციის და უმაღლეს დონეზე სახელმწიფო ღალატის მტკიცებულებაა“.

„დღეს ჩვენს ხელთ არსებული მრავალსაათიანი ჩანაწერი სახელმწიფო ღალატის შესახებ განცხადებასთან ერთად გენერალური პროკურორის ოფისს გადავეცით, რათა სისხლის სამართლის წარმოება დარეგისტრირდეს“, - განაცხადა მან.

დერკაჩმა ასევე განმარტა, რომ საუბრები 2015-2016 წლებში ჩაწერილი და მან ისინი ჟურნალისტებისგან მიიღო. რეპორტიორების სახელები მას არ დაუკონკრეტებია.

ჩანაწერებში ადამიანები, რომელთა ხმებსაც პოროშენკოსას და ბაიდენისას ამსგავსებენ, უკრაინის იმჟამინდელი გენერალური პროკურორის, ვიქტორ შოკინის გათავისუფლებას განიხილავენ და მას საერთაშორისო სავალუტო ფონდის მიერ კიევისთვის მილიარდი დოლარის გამოყოფას უკავშირებენ.

„თუ ახალი მთავრობა და ახალი გენერალური პროკურორი გეყოლებათ, მზად ვარ საჯაროდ მოვაწერო ხელი ვალდებულებებს 1 მილიარდი დოლარის შესახებ“, - ამბობს „ბაიდენი“. „პოროშენკო“ კი მის მიერ წაყენებულ პირობას „უაღრესად ძლიერ მოტივაციას“ უწოდებს. დერკაჩის თქმით, სწორედ ამიტომ გაათავისუფლა პოროშენკომ შოკინი, რომელიც კომპანია Burisma-ს საქმეს იძიებდა და ჯო ბაიდენის შვილზე „გავიდა“.

ექსპერტიზებს ჩანაწერების ავთენტურობა ჯერ არ დაუდასტურებიათ.

Burisma Holdings-ი დონალდ ტრამპის იმპიჩმენტის პროცედურის ერთ-ერთი საბაბი გახდა. სწორედ ეს კომპანია ახსენა აშშ-ის მოქმედმა პრეზიდენტმა უკრაინელ კოლეგა ვოლოდიმირ ზელინსკისთან სატელეფონო საუბარში. ტრამპმა ზელენსკის კომპანიაში ჰანტერ ბაიდენის საქმიანობასთან დაკავშირებით გამოძიების დაწყება სთხოვა.