იენს სტოლტენბერგი: ნატოს წევრი ქვეყნის შიგნით სამხედრო ძალის გამოყენება უკანასკნელი საშუალება უნდა იყოს

ნატოს გენერალურმა მდივანმა, იენს სტოლტენბერგმა შეშფოთება გამოთქვა იმის გამო, რომ აშშ-ის პრეზიდენტი, დონალდ ტრამპი საპროტესტო აქციების გასაკონტროლებლად სამხედროების გამოყენებას გეგმავს.

Sky News-სთვის მიცემულ ინტერვიუში იენს სტოლტენბერგმა განაცხადა, რომ „გამოხატვის თავისუფლება და მშვიდობიანი დემონსტრაციების უფლება თავისუფალი დემოკრატიული საზოგადოებების ფუნდამენტური ნაწილია“.

„როდესაც საქმე სამხედროების გამოყენებას ეხება, ნატოს წევრ ქვეყნებში განსხვავებული კანონმდებლობა მოქმედებს, მაგრამ ნატოს ყველა წევრ ქვეყანაში სამხედროების გამოყენება ყოველთვის განიხილება, როგორც უკანასკნელი საშუალება. ეს არის საკითხი, რომელიც აშშ-ის ინსტიტუტებმა უნდა გადაწყვიტონ, თუმცა ნატოს წევრი ქვეყნების შიგნით სამხედრო ძალის გამოყენება ყოველთვის იყო ძალიან მაღალი ბარიერი. მე შოკირებული ვარ, ყველანი შოკირებულნი ვართ ჯორჯ ფლოიდის გარდაცვალებით და სამძიმარი მინდა გამოვუცხადო მის ოჯახს“, - განაცხადა იენს სტოლტენბერგმა.

აღსანიშნავია, რომ 3 ივნისს, აშშ-ის თავდაცვის მდივანმა, მარკ ესპერმა განაცხადა, რომ მხარს არ უჭერს ამბოხების შესახებ კანონის გამოყენებას, რომელიც აშშ-ის პრეზიდენტს საშუალებას მისცემს სამხედროები გამოიყენოს არეულობების ფონზე სამართალდამცველების ფუნქციების შესასრულებლად.

აშშ-ში საპროტესტო აქციები ჯორჯ ფლოიდის მკვლელობას მოჰყვა. 28 მაისს საპროტესტო აქციის მონაწილეებმა მინეაპოლისის პოლიციის შენობა დაიკავეს და ცეცხლი წაუკიდეს. 30 მაისს ფლოიდის საქმეზე დაკავებულ ყოფილ პოლიციელს ბრალი წინასწარი განზრახვის გარეშე მკვლელობის მუხლით წაუყენეს. საპროტესტო აქციების გამო 25-ზე მეტ ქალაქში კომენდანტის საათი გამოცხადდა. 2 ივნისს დამოუკიდებელმა ექსპერტიზამ დაადგინა, რომ ფლოიდის გარდაცვალების მიზეზი ასფიქსია გახდა.