ინდოეთსა და ჩინეთის საზღვარზე შეტაკების შედეგად დაღუპულთა რიცხვი გაიზარდა

გალვანის ხეობის რაიონში ინდოელ და ჩინელ სამხედროებს შორის დაპირისპირების შედეგად დაღუპულთა რიცხვი გაიზარდა. ამის შესახებ BBC წერს.

გამოცემის ინფორმაციით, შეტაკებას სულ მცირე 20 ინდოელი ჯარისკაცი ემსხვერპლა. მანამდე ვრცელდებოდა ცნობა 3 დაღუპულის შესახებ, თუმცა ინდოეთის თავდაცვის სამინისტროში განმარტეს, რომ მოგვიანებით 17 დაჭრილი გარდაიცვალა.

ამასთან, ინდური მხარე ამტკიცებს, რომ გარდაცვლილები ჩინელ ჯარისკაცებს შორისაც არიან და განმარტავს, რომ ინციდენტი ჩინური მხარის ქმედებებს მოჰყვა, რომელიც საზღვარზე სტატუს-კვოს შეცვლას ცდილობდა. ჩინეთში დაღუპულთა შრის ინფორმაციას არ ადასტურებენ და მომხდარში ინდოეთს ადანაშაულებენ.

მიმდინარე წლის მაისის ბოლოს ინდოეთმა და ჩინეთმა ლადაკხში ფაქტობრივი კონტროლის ხაზთან დანაყოფები გადაისროლეს მას შემდეგ, რაც 5-6 მაისს პანგონგ ცოს ტბასთან სამხედროებს შორის შეტაკებებს ჰქონდა ადგილი. სიტუაცია მას შემდეგ გამწვავდა, რაც ჩინელმა სამხედროებმა რამდენი კარავი გაშალეს გალვანის მდინარესთან და სამშენებლო სამუშაოები დაიწყეს.