„მანჩესტერ სიტი“ - „ბარნლის“ თამაშის დროს, თვითმფრინავის საშუალებით გამოფენილი ბანერის ავტორი სამსახურიდან გაათავისუფლეს

„მანჩესტერ სიტი“ - „ბარნლის“ თამაშის დროს, თვითმფრინავის საშუალებით გამოფენილი ბანერის, White Lives Matter-ის (თეთრების ცხოვრებაც მნიშვნელოვანია) ავტორი, ჯეიკ ჰეპლი სამსახურიდან გაათავისუფლეს და საფეხბურთო მატჩებზე დასწრება სამუდამოდ აუკრძალეს, - ამის შესახებ ინფორმაციას Sky News ავრცელებს.

ჰეპლი „ბარნლის“ გულშემატკივარია და ერთ-ერთ კომპანიაში შემდუღებლად მუშაობდა. მის გარდა სამსახური დაკარგა ჯეკის შეყვარებულმა მეგან რამბანდტმა, რომელმაც „ტვიტერზე“ ასეთი სტატუსი დაწერა: „მე მიყვარს ბარნლი, მაგრამ ქალაქის ცენტრში რომ გავდივარ, სხვა ქვეყანა მხვდება. კარგი იქნება, თუ ამ ზაზუნებს გავისტუმრებთ თავის ბანანის რესპუბლიკაში“, - აღნიშნა მან.

ასეთი პოსტის შემდეგ რამბანდტი სილამაზის სალონიდან გაუშვეს. რაც შეეხება ჰეპლის მიერ თამაშის დროს ჩატარებულ ორიგინალურ აქციას, როგორც ირკვევა მას თვითმფრინავის ქირაობასა და ამ ყველაფრის ორგანიზებაში „ბარნლის“ ფან-კლუბის 60-კაციანი დაჯგუფება დაეხმარა და სავარაუდოდ, სასჯელი არც მათ ასცდებათ.

ჯორჯ ფლოიდის მკვლელობის შემდეგ, თითოეული შეხვედრის დაწყებამდე, პრემიერლიგის კლუბის ფეხბურთელები მცირე ხნით ჩამუხლულები არიან და მაისურებზე წარწერით, Black Lives Matter (შავების სიცოცხლე მნიშვნელოვანია) ფლოიდის მიმართ სოლიდარობას გამოხატავენ.