უკრაინის მოსამართლეთა საბჭო სააკაშვილის განცხადებებთან დაკავშირებით ღრმა შეშფოთებას გამოთქვამს

უკრაინის მოსამართლეთა საბჭო და მოსამართლეთა საზოგადოება რეფორმების ეროვნული კომიტეტის აღმასკომის თავმჯდომარის, მიხეილ სააკაშვილის განცხადებებთან დაკავშირებით ღრმა შეშფოთებას გამოთქვამენ. ამასთან დაკავშირებით განცხადება უკრაინის მოსამართლეთა საბჭოს თავმჯდომარემ, ბოგდან მონიჩმა გაავრცელა.

„შეგახსენებთ, რომ 30 ივნისს გაიმართა რეფორმების ეროვნული საბჭოს სხდომა, რომელშიც მონაწილეობა მიიღეს უკრაინის პრეზიდენტმა ვოლოდიმირ ზელენსკიმ, უკრაინის მინისტრთა კაბინეტის და უმაღლესი რადის ხელმძღვანელობამ. სხვა საკითხებთან ერთად, განიხილებოდა მორიგი სასამართლო რეფორმის საკითხი. სხდომაზე ვოლოდიმირ ზელენსკიმ აღნიშნა სასამართლო რეფორმის აუცილებლობა, ვინაიდან საზოგადოებაში არსებობს სამართლიანობის და უსაფრთხოების მაღალი მოთხოვნა.

უკრაინის მოსამართლეთა საბჭო ეთანხმება უკრაინის პრეზიდენტს, რომ საზოგადოებაში არსებობს სამართლიანობის მოთხოვნა, თუმცა სამართლიანობა ყოველთვის არ ნიშნავს კანონიერებას. ამიტომაც, სასამართლო რეფორმის არსი სწორედ იმაში უნდა მდგომარეობდეს, რომ გაერთიანდეს „სამართლიანობა“ და „კანონიერება“, ვინაიდან რაც უფრო ნაკლებია მათ შორის სხვაობა, მით უფრო გრძნობენ მოქალაქეები თავიანთი უფლებების დაცვას სახელმწიფოს მხრიდან, სასამართლო ხელისუფლების მეშვეობით.

ბატონი სააკაშვილის განცხადება, რომ „ეს იქნება ჩვენს სასამართლო სისტემის ფუნდამენტური გადანაწილება“ , საგანგაშოა თავისი რადიკალურობით და კატეგორიულობით. ასეთი განცხადებების გაკეთებამდე ბატონმა სააკაშვილმა უნდა იცოდეს, რომ სწორედ მსგავსი განცხადებების და მოსამართლეების დანიშვნის დაურეგულირებელი პროცედურების გამო, შეიქმნა კატასტროფული საკადრო დეფიციტი.

გარდა ამისა, ერთ-ერთი ტელეარხის ეთერში რეფორმების აღმასრულებელი კომიტეტის თავმჯდომარემ დაასახელა ხელისუფლების სასამართლო შტო, როგორც უკრაინაში ინვესტიციების არარსებობის მთავარი მიზეზი, და განაცხადა, რომ ხელისუფლების სასამართლო შტო „მძიმედ არის ავად“.

როგორც მოგეხსენებათ, „რეფორმების ეროვნული საბჭოს და რეფორმების აღმასრულებელი კომიტეტის საკითხის შესახებ“ უკრაინის პრეზიდენტის განკარგულების თანახმად, რეფორმების აღმასრულებელი კომიტეტი (შემდგომში - „კომიტეტი“) არის უკრაინის პრეზიდენტთან არსებული დამხმარე ორგანო, რომლის ძირითადი მიზანი რეფორმების სტრატეგიული დაგეგმარების შესახებ წინადადებების მომზადება, მათი შეთანხმებული განხორციელება და რეფორმების რეალიზაციის მონიტორინგია.

თავის საქმიანობაში, კომიტეტი ხელმძღვანელობს უკრაინის კონსტიტუციით და კანონებით, უკრაინის პრეზიდენტის, უკრაინის მინისტრთა კაბინეტის აქტებით, სხვა საკანონმდებლო აქტებით.

კომიტეტის თავმჯდომარის მოვალეობები განსაზღვრულია შესაბამისი განკარგულებით და მათ არ მიეკუთვნებათ ისეთი ქმედებების შესრულება, რომელიც მიმართულია საკანონმდებლო, აღმასრულებელი და სასამართლო შტოებად ხელისუფლების დაყოფასთან დაკავშირებული საკონსტიტუციო საფუძვლების შერყევისკენ, სასამართლოების და მოსამართლეების დამოუკიდებლობის პრინციპების უგულებელყოფისკენ.

იმედს გამოვთქვამთ, რომ მსგავსი ხმამაღალი განცხადებები არ არის ხელისუფლების სასამართლო შტოს გადაუდებელი პრობლემების არცოდნის და უუნარობის გამოვლინება“, - აღნიშნულია განცხადებაში.