ირანი თეირანის ტერაქტებში საუდის არაბეთის კვალს ხედავს

„ირანის ისლამური რევოლუციის გუშაგთა კორპუსში" ფიქრობენ, რომ თეირანში დღეს განხორციელებული ტერაქტების უკან შესაძლოა საუდის არაბეთი და ამერიკის შეერთებული შტატები იდგეს. ამის შესახებ Reuters-ი ირანულ საინფორმაციო სააგენტო Fars-ზე დაყრდნობით წერს.

სტატიის თანახმად, ტერორისტული აქტები "საეჭვოდ" დაემთხვა აშშ-ის პრეზიდენტის დონალდ ტრამპის ვიზიტს საუდის არაბეთში, სადაც მან ირანის იზოლაცია მოითხოვა. გამოცემა დღევანდელი ტერაქტის წინაპოლიტიკურ სიტუაციაზეც ამახვილებს ყურადღებას, კონკრეტულად კი სუნიტი ქვეყნების მიერ (საუდის არაბეთი) კატართან დიპლომატიური ურთიერთობების გაწყვეტაზე წერს. არაბულმა ქვეყნებმა კატარი რეგიონში ტერორიზმისა და დესტაბილიზაციის მხარდაჭერაში დაადანაშაულეს. კერძოდ, ეგვიპტემ განაცხადა, რომ ოფიციალური დოჰა „მუსლიმ ძმებს“ ეხმარება, რომელიც ირანშია დაარსებული.

ეს ტერორისტული აქტი იმით იყო გამორჩეული, რომ სუნიტმა მუსლიმებმა მკაცრად კონტროლირებულ შიიტურ სახელმწიფოში მოაწყვეს. ასეთი შემთხვევა, როგორც Reuters წერს პირველად მოხდა. თეირანის ტერაქტებზე პასუხისმგებლობა "ისლამურმა სახელმწიფომ" აიღო.

დღეს თერიანში ორ ლოკაციაზე მოხდა ტერორისტების თავდასხმა. პირველად სროლის ხმა ირანის პარლამენტში გაისმა, სადაც დაცვის ერთი თანამშრომელი დაიღუპა. ინციდენტიდან რამდენიმე წუთში გავრცელდა ინფორმაცია იმის შესახებ, რომ აიათოლა ხომეინის მავზოლეუმში სამი ადამიანი შეიჭრა, მათგან ორმა მავზოლეუმის ვიზიტორებს გაუხსნა ცეცხლი, ერთმა თავდამსხმელმა კი მავზოლეუმის მიმდებარე ტერიტორიაზე თავი აიფეთქა. ირანული მედიის ცნობით, ტერორისტის თანამზრახველი ორი ქალი და 1 კაცი იყო, რომელთაგანაც ერთმა თავი აიფეთქა, ერთი დააკავეს, ერთი კი შეტაკების დროს გარდაიცვალა.

ამასობაში, ირანის პარლამენტში სიტუაცია ისევ დაიძაბა. იქ კიდევ 3 თავდამსხმელი შეიჭრა, რომელთაგანაც ერთმა თავი აიფეთქა, ასევე გაისმა რამდენჯერმე გასროლის ხმაც. 

გავრცელებული ინფორმაციით, პარლამენტსა და მავზოლეუმზე თავდასხმის შედეგად 12 ადამიანი გარდაიცვალა, 42 კი დაშავდა. 

„ირანის ისლამური რევოლუციის გუშაგთა კორპუსი“ ირანის ელიტური სამხედრო დანაყოფია, რომელიც უშუალოდ ირანის უზენაეს ლიდერს აიათოლა ალი ხომენეის ექვემდებარება. ის 1979 წელს დაარსდა ირანში ისლამური რევოლუციის შემდეგ.