დღეს დიდ ბრიტანეთში ვადამდელი საპარლამენტო არჩევნებია

8 ივნისს, დიდ ბრიტანეთში ვადამდელი საპარლამენტო არჩევნებია. ის განსაზღვრავს როგორც მომავალი მთავრობის შემადგენლობას, ასევე იმას, თუ ვინ გამართავს ევროკავშირთან მოლაპარაკებებს ბრიტანეთის ბლოკიდან გასვლის პირობებზე. მოლაპარაკებები, სავარაუდოდ 19 ივნისს დაიწყება.

არჩევნები, ორი ტერაქტის გამოძიების ფონზე მიმდინარეობს.

დიდი ბრიტანეთისა და მისი უცხოური ტერიტორიების 650 საარჩევნო ოლქიდან, თითოეული აირჩევს ერთ დეპუტატს. იმის მიხედვით, თუ რამდენ მანდატს მიიღებს თითოეული პარტია, ქვეყანას ეყოლება ერთპარტიული ან კოალიციური მთავრობა. ხელახალი არჩევის პროცედურას გაივლის პრემიერმინისტრი ტერეზა მეი და მთავრობის ყველა მინისტრი. 
 
ქვეყანაში საარჩევნო უბნები გაიხსნება 07:00 საათზე და დაიხურება 22:00 საათზე, რის შემდეგაც გამოქვეყნდება ეგზიტპოლების შედეგები და დაიწყება ხმების დათვლა.

ბრიტანეთის პარლამენტში ადგილებისთვის რამდენიმე წამყვანი პარტია იბრძვის. ესენია ტერეზა მეის მმართველი კონსერვატიული პარტია, ჯერემი კორბინის ლეიბორისტები და ტიმ ფარონის ლიბერალ დემოკრატები. კიდევ ერთი პროევროპული პარტია ნიკოლა სტარჯონის შოტლანდიის ნაციონალური პარტიაა. 

მთავარი პარტიების ლიდერები არჩევნებში ხმას მისცემენ დღის პირველ ნახევარში, რის შემდეგაც მთელი დღის და ღამის განმავლობაში თავიანთ საარჩევნო ოლქებში იქნებიან.

თანამედროვე ბრიტანული მონარქიის მთავარი პრინციპიდან გამომდინარე, რომ მონარქია პოლიტიკაზე მაღლა დგას, დედოფალი ელისაბედ მეორე და მისი ახლო ნათესავები არჩევნებში მონაწილეობას არ იღებენ.

გარდა იმისა, რომ არჩევნები მოულოდნელად დაინიშნა, ის ორი ტერაქტის გამოძიების ფონზე მიმდინარეობს, რამაც ექსპერტების აზრით, შეცვალა პოლიტიკურ ძალთა პოზიციები. ბოლო ორთვენახევრის განმავლობაში დიდ ბრიტანეთში სამი ტერორისტული აქტი მოხდა, მათ შორის სულ ბოლო, ლონდონში 3 ივნისს, რასაც 7 ადამიანის სიცოცხლე ემსხვერპლა, დაშავდა - 48.

კვლევების თანახმად, ტერაქტებმა ზიანი მიაყენა მმართველ კონსერვატიულ პარტიას, რომლის მხარდაჭერის რეიტინგი ჯერ კიდევ მანჩესტერის თავდასხმის შემდეგ შემცირდა. აპრილში მეის პარტიის წარმატებაში ეჭვი არავის ეპარებოდა. კონსერვატორებმა დამაჯერებლად გაიმარჯვეს მაისის ადგილობრივი თვითმმართველობის არჩევნებშიც, თუმცა ზოგიერთი ბოლო კვლევით, მათ მანდატების აბსოლუტური უმრავლესობის მოპოვება შეიძლება გაუჭირდეთ. პარტიის რეიტინგის ვარდნას, ტერაქტების გამო მოსახლეობის ემოციური მდგომარეობის გარდა იმასაც უკავშირებენ, რომ პრემიერმინისტრობამდე ტერეზა მეი შინაგან საქმეთა სამინისტროს ხელმძღვანელობდა და მისი მმართველობის პერიოდს სისტემაში პოლიციელების რაოდენობის შემცირება უკავშირდება.

ბრიტანული Times-ისთვის ჩატარებულ კვლევაში, კონსერვატორებს 42%-იანი მხარდაჭერა აქვთ, ლეიბორისტებს 35%-იანი.

პრემიერმინისტრმა ტერეზა მეიმ ვადამდელი საპარლამენტო არჩევნების დანიშვნა იმით ახსნა, რომ ევროკავშირთან Brexit-ზე მოლაპარაკებებში ქვეყანას მაღალი ლეგიტიმაციის მთავრობა სჭირდებოდა.