მედია: ლიეტუვის პრეზიდენტმა სვეტლანა ტიხანოვსკაია ნობელის პრემიაზე წარადგინა

ლიეტუვის პრეზიდენტმა, გიტანას ნეუსადამ ბელარუსის ოპოზიციის ლიდერი, სვეტლანა ტიხანოვსკაია ნობელის პრემიაზე წარადგინა, - ინფორმაციას Reuters-ი საკუთარ წყაროებზე დაყრდნობით ავრცელებს.

გასული წლის დეკემბერში, სვეტლანა ტიხანოვსკაიას ბრიუსელში, ევროპარლამენტის პლენარულ სხდომაზე სახაროვის სახელობის პრემია „აზრის თავისუფლებისთვის“ გადასცეს. გამოცემის ინფორმაციით, ბელარუსის პრეზიდენტობის ყოფილ კანდიდატს ჯილდო ევროპარლამენტის თავმჯდომარემ, დავიდ სასოლიმ გადასცა.

იქამდე კი, 2020 წლის სექტემბერში ლიეტუვის პარლამენტმა რეზოლუცია მიიღო, რომელშიც სვეტლანა ტიხანოვსკაიას ბელარუსის არჩეულ პრეზიდენტად მოიხსენიებს.

სვეტლანა ტიხანოვსკაია ან სვიატლანა ციხანოუსკაია ბელარუსი ადამიანის უფლებათა დამცველი და პოლიტიკოსია. 2020 წელს ტიხანოვსკაია იყო ოპოზიციის კანდიდატი ბელარუსის საპრეზიდენტო არჩევნებში. ოპოზიციის საპრეზიდენტო კანდიდატი სვეტლანა მისი მეუღლის, სერგეი ტიხანოვსკის დაპატიმრების შემდეგ გახდა.

2020 წლის ბელარუსის საპრეზიდენტო არჩევნებში გამარჯვებულად თავი ბელარუსის მოქმედმა პრეზიდენტმა, ალექსანდრე ლუკაშენკომ გამოაცხადა. არჩევნების შედეგების გაყალბებასა და დარღვევებს მასობრივი საპროტესტო აქციები მოჰყვა. ტიხანოვსკაიამ საკუთარი თავი გამარჯვებულად გამოაცხადა. მისი გუნდის მტკიცებით, მან ხმების 60-დან 70 პროცენტამდე მიიღო, რის შემდეგაც მან მიმართა დასავლეთის ქვეყნების პრეზიდენტად აღიარების თხოვნით.

2020 წლის 10 აგვისტოს, ბელარუსის საარჩევნო კომისიის ოფიციალური შედეგების გამოქვეყნების შემდეგ, ტიხანოვსკაიამ მიმართა კომისიას დარღვევების აღრიცხვისა და შედეგების გადათვლის მოთხოვნით. კომისიის შენობაში ის შეხვდა ძალოვანი სტრუქტურების წარმომადგენლებს, რის შემდეგაც მან წაიკითხა მიმართვა პროტესტის მონაწილეებისთვის, რომელშიც პროტესტის შეწყვეტისკენ მოუწოდა, რის შემდეგაც მასთან კავშირი შეწყდა.

2020 წლის 11 აგვისტოს ლიტვის საგარეო საქმეთა მინისტრმა ლინას ლინკევიჩუსმა გაავრცელა ინფორმაცია ტიხანოვსაიას ლიტვაში ყოფნის შესახებ. მოგვიანებით გაირკვა, რომ ბელარუსმა ძალოვანებმა ტიხანოვსკაიას ვიდეოს ჩაწერა და ქვეყნის დატოვება აიძულეს.