ირანის პრეზიდენტმა ბირთვული შეთანხმების ვალდებულებების შესრულებისკენ დაბრუნების წინაპირობა დაასახელა

ირანის პრეზიდენტის, ჰასან როუჰანის განცხადებით, ქვეყანა 2015 წლის ბირთვული შეთანხმების პირობების შესრულებისკენ ნაბიჯების გადადგმისკენ მზად არის, თუმცა ამის წინაპირობად აშშ-ის მიერ ეკონომიკური სანქციების მოხსნას ასახელებს. ამის შესახებ AP წერს.

გამოცემის ინფორმაციით, შესაბამისი განცხადება როუჰანიმ ირლანდიის საგარეო საქმეთა მინისტრთან, საიმონ კვენისთან შეხვედრისასა გააკეთა, რომელიც ირანში ვიზიტით იმყოფება.

„როგორც კი აშშ უკანონო სანქციებს მოხსნის და მუქარისა და ზეწოლის პოლიტიკაზე უარს იტყვის, ირანი მზად არის დაუყოვნებლივ მიიღოს ზომები ბირთვული შეთანხმების ვალდებულებების შესასრულებლად“, - განაცხადა როუჰანიმ.

მან ბირთვული შეთანხმების ხელმომწერი ევროპული სახელმწიფოების მთავრობები მათი „უმოქმედობის“ გამო გააკრიტიკა. როუჰანის თქმით, ისინი დოკუმენტის პირობებს არ ასრულებენ და თეირანი ერთადერთი მხარეა, რომელიც თავის ვალდებულებებს ასრულებს.

ტრამპის ადმინისტრაციის გადაწყვეტილებით, აშშ-მა ირანთან მიღწეული საერთაშორისო ბირთვული შეთანხმება 2018 წლის მაისში დატოვა და თეირანის წინააღმდეგ სანქციები დააწესა.