ევროპარლამენტი: რუსეთი ევროპული უსაფრთხოებისთვის საფრთხეს წარმოადგენს

ევროპარლამენტმა რუსეთის უკრაინასა და ჩეხეთთან ურთიერთობების გამწვავებისა და ალექსეი ნავალნის მოწამვლის შესახებ რეზოლუცია მიიღო. რეზოლუციას მხარი 548 ევროპარლამენტარმა დაუჭირა, 113-მა ევროდეპუტატმა თავი შეიკავა, ხოლო ევროპარლამენტის 25 წევრი წინააღმდეგ წავიდა.

რეზოლუციაში აღნიშნულია, რომ რუსეთი ევროპული უსაფრთხოებისთვის არა მხოლოდ გარე საფრთხეს წარმოადგენს, არამედ საკუთარი ხალხის წინააღმდეგაც აწარმოებს შიდა ომს.

ევროპარლამენტარები მხარდაჭერას უცხადებენ უკრაინის სუვერენიტეტსა და ტერიტორიულ მთლიანობას და ხაზგასმით აღნიშნავენ, რომ ყირიმის უკანონო ანექსიას არ აღიარებენ.

„რუსეთსა და ევროკავშირს შორის ურთიერთობების ამჟამინდელი მდგომარეობა რუსეთის აგრესიით, უკრაინაში დესტაბილიზაციის გამომწვევი ქმედებით და ევროკავშირის წევრ ქვეყნებზე ღია თავდასხმებით არის გამოწვეული. ევროპარლამენტი მტკიცედ გმობს ევროპაში რუსეთის ამ მტრულ საქმიანობას და რუსეთის მთავრობას მოუწოდებს, შეწყვიტოს ეს საქმიანობა, რომელიც საერთაშორისო სამართლის ნორმებსა და პრინციპებს არღვევს და ევროპის სტაბილურობას საფრთხეს უქწმნის“, - ნათქვამია ევროპარლამენტის რეზოლუციაში.

ევროპარლამენტარებმა ასევე განაცხადეს, რომ კვლავ შეშფოთებულნი არიან უკრაინის საზღვართან რუსეთის შეიარაღებული ძალების კონცენტრირებით.

„თუ მომავალში სამხედრო პოტენციალის გაძლიერება რუსეთის მიერ უკრაინაში შეჭრას გამოიწვევს, ევროკავშირმა მკაფიოდ უნდა გააგებინოს რუსეთს, რომ ეს ძვირი დაუჯდება. ასეთ ვითარებაში, რუსეთიდან ევროკავშირში ნავთობისა და გაზის ექსპორტი დაუყოვნებლივ უნდა შეწყდეს, რუსეთი SWIFT-ის საგადასახადო სისტემიდან უნდა გარიცხონ, ხოლო ევროკავშირში რუსი ოლიგარქებისა და რუსეთის ხელისუფლებასთან დაახლოებული პირების აქტივები უნდა გაიყინოს, მათი ვიზები კი გაუქმდეს“, - ნათქვამია რეზოლუციაში.

ევროპარლამენტი ასევე ითხოვს „ჩრდილოეთის ნაკადი-2“-ის პროექტის მშენებლობისა და „როსატომთან“ თანამშრომლობის შეჩერებას, რათა ევროკავშირის რუსეთის ენერგეტიკაზე დამოკიდებულება შემცირდეს.