ავღანეთის პრეზიდენტის ადმინისტრაცია: ქაბულის რამდენიმე შორეულ რაიონში სროლის ხმა ისმოდა - სიტუაცია კონტროლდება

ავღანეთის პრეზიდენტის, აშრაფ ღანი ადმინისტრაცია, დედაქალაქში „თალიბების“ შესვლის შესახებ, Twitter-ზე განცხადებას ავრცელებს.

„პატივცემულო მოქალაქენო, ქაბულის რამდენიმე შორეულ რაიონში ისმოდა სროლის ხმა. ქვეყნის უსაფრთხოებისა და თავდაცვის ძალები, საერთაშორისო პარტნიორებთან კოორდინაციით, აკონტროლებენ ქაბულში უსაფრთხოებას“, - აღნიშნულია განცხადებაში.

„თალიბანის“ ბოლო განცხადების თანახმად, მათ გეგმებში ქაბულის „ძალის გამოყენებით“ აღება არ შედის.

ამ წუთებში, დაჯგუფების წარმომადგენლები დედაქალაქში, პრეზიდენტის სასახლეში არიან და მთავრობის წარმომადგენლებს ხვდებიან. მათი თქმით, ხელისუფლებასთან მოლაპარაკებებს „ქაბულის მშვიდობიანად გადასაცემად და ძალაუფლების გადასაბარებლად“ აწარმოებენ.

„თალიბანი“ ქაბულში ყველა მხრიდან შემოდის“, - ვკითხულობთ ავღანეთის შინაგან საქმეთა სამინისტროს განცხადებაში. მედიის ცნობით, დაჯგუფების წარმომადგენლებს მიღებული აქვთ ბრძანება, რომ დარჩნენ ქალაქის შესასვლელებთან და ჯერ, ქაბულში გადაადგილება არ დაიწყონ.

აშშ-ის საელჩოს სახურავის მიმდებარედ, ცოტა ხნის წინ, კვამლი შეინიშნებოდა. მედიის ცნობით, სავარაუდოდ, დიპლომატები ანადგურებენ დოკუმენტაციას, რომელიც არ სურთ, „თალიბანის“ ხელში აღმოჩნდეს. მას შემდეგ, რაც დიპლომატებმა შენობა ავტომობილებით დატოვეს, საელჩოს სახურავზე ვერტმფრენები დაეშვნენ.

ავღანეთის 34 პროვინციის ადმინისტრაციული ცენტრებიდან 23 უკვე „თალიბების“ ხელშია. ქვეყნის ძირითადი ქალაქებიდან დედაქალაქი ქაბული ახლა ერთადერთი ადგილია, რომელზეც მთავრობის კონტროლი ამ დრომდე ვრცელდებოდა, თუმცა, დედაქალაქის „თალიბების“ მიერ აღებას ჯერ არცერთი მხარე არ ადასტურებს. აღსანიშნავია, რომ, რამდენიმე საათის წინ, დაჯგუფებამ ნანგარჰარის პროვინციის დედაქალაქი, ჯალალაბადი აიღო და როგორც მედია წერს, დაჯგუფებას ამ ქალაქზე კონტროლის დასამყარებლად, ბრძოლაც კი არ დასჭირვებია.

ამერიკის პრეზიდენტის, ჯო ბაიდენის გადაწყვეტილებით, ავღანეთში, დამატებით, 1 000 სამხედრო გაიგზავნება.

1-ელ მაისს შეერთებულმა შტატებმა ავღანეთიდან ჯარის გაყვანა ოფიციალურად დაიწყო. 14 აპრილს აშშ-ის პრეზიდენტმა, ჯო ბაიდენმა ავღანეთიდან ამერიკული ჯარების გამოყვანა გამოაცხადა.

ავღანეთის პრეზიდენტმა, აშრაფ ღანიმ ქვეყანაში უსაფრთხოების მკვეთრად გაუარესებული მდგომარეობა აშშ-ის მიერ ჯარების გაყვანის მოულოდნელ გადაწყვეტილებას დაუკავშირა.