აშშ-ის ადმინისტრაცია: ყირიმი უკრაინაა და ყოველთვის უკრაინა იქნება - რუსეთმა პასუხი უნდა აგოს თავის აგრესიაზე

ვიდრე ყირიმის უკანონო ანექსია და დონბასში აგრესია გრძელდება, აშშ რუსეთის წინააღმდეგ სანქციებს შეინარჩუნებს, - განაცხადა აშშ-ის ენერგეტიკის მდივანმა, ჯენიფერ გრენჰოლმმა „ყირიმის პლატფორმის სამიტზე“ სიტყვით გამოსვლისას.

„აშშ ამაყობს იმით, რომ მხარს უჭერს ყირიმის პლატფორმას. მსურს მკაფიოდ განვაცხადო: ჩვენ ვგმობთ ყირიმის უკანონო ანექსიას. ჩვენ განვაგრძობთ ყირიმის პლატფორმის მხარდაჭერას, რათა მუდმივად შევახსენოთ, რომ ყირიმი უკრაინაა და ყოველთვის უკრაინა იქნება. რუსეთმა პასუხი უნდა აგოს თავის აგრესიაზე“, - აღნიშნა აშშ-ის ენერგეტიკის მდივანმა.

ჯენიფერ გრენჰოლმის თქმით, პრეზიდენტი ბაიდენი მხარს უჭერს უკრაინას რეფორმების გატარებაში, ევროატლანტიკური მისწრაფებების მიღწევასა და ქვეყნისთვის უკეთესი მომავლის განვითარებაში.

„ეს კორუფციისა და რუსეთის აგრესიის წინააღმდეგ ბრძოლას მოიცავს. მინდა დაგარწმუნოთ, რომ ჩვენი მხარდაჭერა კონკრეტული და არსებითი იქნება“, - განაცხადა აშშ-ის ენერგეტიკის მდივანმა.

მან ასევე აღნიშნა, რომ აშშ განაგრძობს დიპლომატიურ ძალისხმევას აღმოსავლეთ უკრაინაში კონფლიქტის დასასრულებლად.

„ჩვენ შევინარჩუნებთ სანქციებს რუსეთის წინააღმდეგ მანამ, სანამ ყირიმის ანექსია და დონბასში აგრესია გრძელდება. ხაზგასმით აღვნიშნავთ, რომ რუსეთმა უნდა შეასრულოს თავისი ვალდებულებები მინსკის შეთანხმებების ფარგლებში და კონფლიქტის დასრულების მიზნით ითანამშრომლოს“, - განაცხადა აშშ-ის ენერგეტიკის მდივანმა.

„ყირიმის პლატფორმის“ სამიტი კიევში დღეს გაიხსნა. სამიტს 40-ზე მეტი ქვეყნის ლიდერები ესწრებიან, მათ შორის ევროპის საბჭოს პრეზიდენტიც.