დონალდ ტრამპი ანტირუსული სანქციების კანონს ხელს მოაწერს

აშშ-ს პრეზიდენტი დონალდ ტრამპი მზად არის ხელი მოაწეროს სენატის მიერ მიღებულ კანონპროექტს, რომელიც რუსეთის, ირანის და ჩრდილოეთ კორეის წინააღმდეგ სანქციების გაძლიერებას ეხება. ამის შესახებ თეთრი სახლის პრესსამსახურზე დაყრდნობით სააგენტო Reuters წერს.

„ტრამპმა კანონპროექტის პირვანდელი ვარიანტები წაიკითხა და მისი უმნიშვნელოვანესი ელემენტები განიხილა. ახლა კი ის საბოლოო ვერსიას გაეცნო და იმის საფუძველზე, რომ მისი ყველა შენიშვნა გათვალისწინებული იყო, კანონპროექტი მოიწონა და მის ხელმოსაწერად მზადაა,“- განაცხადეს პრეზიდენტის ადმინისტრაციაში. 

აშშ-ის სენატმა მიიღო კანონი ახალ სანქციებზე რუსეთის, ირანის და ჩრდილოეთ კორეის წინააღმდეგ. დოკუმენტს 98-მა სენატორმა დაუჭირა მხარი 2-ის წინააღმდეგ.  25 ივლისს, ახალ სანქციებს აშშ-ის წარმომადგენლობითმა პალატამ დაუჭირა მხარი. კენჭისყრაზე ინიციატივამ როგორც დემოკრატების, ისე რესპუბლიკელების მხარდაჭერა მოიპოვა. ამის შემდეგ გადაეგზავნა დოკუმენტი მხარდასაჭერად სენატს. 

სანქციები შეეხება ნავთობის, გაზისა და საბანკო სექტორებს. სანქციების მიზანი პროექტ "ჩრდილოეთის ნაკადი 2"-ისთვის წინააღმდეგობის გაწევაა.

სენატის მიერ ანტირუსული სანქციების მხარდაჭერას რუსეთის საგარეო საქმეთა სამინისტრო ოფიციალური განცხადებით გამოეხმაურა.

„აშშ-ის ეს ნაბიჯი კიდევ ერთხელ ადასტურებს საერთაშორისო საკითხებში ამერიკის აგრესიას. ამერიკა ქედმაღლურად უგულებელყოფს სხვა ქვეყნების პოზიციებსა და ინტერესებს. ამასთან, აშშ აბსოლუტურად უსაფუძვლო ბრალდებით, თითქოს რუსეთი მათი ქვეყნის შიდა საქმეებში ჩაერია, სხვადასხვა სახის ხისტ სანქციებს უწესებს რუსეთს. ეს ყველაფერი ეწინააღმდეგება საერთაშორისო სამართალს. ვაშინგტონის მუდმივი თავდასხმების მიუხედევად, ჩვენ თავშეკავებას ვიჩენთ, ამ დრომდე არ გვიპასუხია ამ აშკარა პროვოკაციისთვის. თუმცა ბოლო დროს განვითარებული მოვლენები იმაზე მიუთითებს, რომ ქვეყნის გარკვეულ წრეებში რუსოფობიამ და ჩვენი ქვეყნის წინააღმდეგ ღია კონფრონტაციამ ღრმად გაიდგა ფესვები“, - ნათქვამია განცხადებაში.

რუსული მხარე აშშ-ს პირველ სექტემბრამდე რუსეთში ამერიკის დიპლომატიური მისიების თანამშრომლების, მათ შორის ტექნიკური თანამშრომლების რაოდენობის გათანაბრების ამერიკაში რუსეთის დიპლომატიურ მისიებში მომუშავე პერსონალის რაოდენობასთან გათანაბრებისკენ მოიწოდებს. ეს ნიშნავს, რომ, საერთო ჯამში, ამერიკის დიპლომატიურ მისიებში მომუშავე თანამშრომლების რიცხვი უნდა შემცირდეს 455 ადამიანამდე.