10 წლის ფეხმძიმე ინდოელი გოგო მედიის ყურადღების ცენტრშია

10 წლის ფეხმძიმე ინდოელი გოგო, რომელსაც სასამართლომ აბორტზე უარი უთხრა, მსოფლიო მედიის ყურადღების ცენტრშია. 

"არასრულწლოვანი ორსულების შესახებ ბევრი გვსმენია, მაგრამ ჩემს პრაქტიკაში, პირველად ვხვდები ასეთ ახალგაზრდა ფეხმძიმე გოგოს", - ამბობს ჩანდიგარის შტატის იურიდიული მომსახურების ცენტრის ხელმძღვანელი მაჰავინ სინჰი.

28 ივლისს, ინდოეთის უზენაესმა სასამართლომ, 10 წლის გოგოს აბორტის გაკეთების უფლება არ მისცა. ის სავარაუდოდ მისმა ბიძამ გააუპატიურა. პოლიციის ცნობით, ძალადობა მრავალჯერადი იყო. ეჭვმიტანილი საპყრობილეშია და სასამართლოს ელოდება. 

ექიმებმა სასამართლოს განუცხადეს, რომ 32-ე კვირას, ორსულობის შეწყვეტა უკვე დაგვიანებულია და "ძალიან სარისკო". სასამართლოს გადაწყვეტილებით გოგოს ოჯახი "უკიდურესად გულდაწყვეტილი" იყო. 

მათი თქმით, გოგო ვერ ხვდება რა ხდება მის თავს. "ექიმებმა მას უთხრეს, რომ მუცელში დიდი ქვა აქვს და ამიტომ დამატებით მკურნალობას გადის".

გოგოს ადვოკატმა აბორტის დაშვებაზე განმეორებითი განცხადება შეიტანა, სადაც ექიმები ამბობენ, რომ გოგო ფიზიკურად ჩამოყალიბებული არ არის და მისთვის საშიში იქნება როგორც მშობიარობა ასევე საკეისრო კვეთა.