იენს სტოლტენბერგი: რუსეთს უკრაინის წინააღმდეგ აგრესია ძვირად დაუჯდება, რასაც სერიოზული პოლიტიკური და ეკონომიკური შედეგები მოჰყვება

რუსეთს უკრაინის წინააღმდეგ აგრესია ძვირად დაუჯდება, რასაც სერიოზული პოლიტიკური და ეკონომიკური შედეგები მოჰყვება, - განაცხადა ნატოს გენერალურმა მდივანმა, იენს სტოლტენბერგმა ნატოს საგარეო საქმეთა მინისტრების შეხვედრის შემდეგ გამართულ პრესკონფერენციაზე.

„სიტუაცია უკრაინაში და მის გარშემო არასტაბილური და არაპროგნოზირებადი რჩება. რუსეთის განზრახვები ნათელი არ არის. ჩვენ ვხედავთ ძალების მნიშვნელოვან და უჩვეულო კონცენტრაციას, რაც გაუმართლებელი და აუხსნელია. ამას თან ახლავს გამძაფრებული რიტორიკა და დეზინფორმაცია. ჩვენ ვიცით, რომ რუსეთმა ადრე ძალა გამოიყენა უკრაინისა და სხვა მეზობლების წინააღმდეგ. ჩვენ გაერთიანებულნი ვართ ჩვენს მიზანში, შევაკავოთ რუსეთი შემდგომი აგრესიული ქმედებებისგან. რუსეთს მოვუწოდებთ, გამჭვირვალე იყოს და დაძაბულობა შეამციროს. რუსეთს უკრაინის წინააღმდეგ აგრესია ძვირად დაუჯდება, რასაც სერიოზული პოლიტიკური და ეკონომიკური შედეგები მოჰყვება. არ უნდა არსებობდეს გაუგებრობა ან არასწორი გათვლა. ჩვენ ერთად ვიცავთ ყველა მოკავშირეს“, - აღნიშნა იენს სტოლტენბერგმა.

14 ნოემბერს, უკრაინის პრეზიდენტმა, ვოლოდიმირ ზელენსკიმ განაცხადა, რომ უკრაინის საზღვართან 100 ათასამდე რუსი სამხედროა განლაგებული. 16 ნოემბერს, აშშ-ის თავდაცვის დეპარტამენტის ოფიციალურმა წარმომადგენელმა, ჯონ კირბიმ განაცხადა, რომ უკრაინის საზღვართან რუსეთის უჩვეულო სამხედრო აქტივობა და შეიარაღებული ძალების კონცენტრაცია კვლავ ფიქსირდება. 18 ნოემბერს, აშშ-ის თავდაცვის მდივანმა, ლოიდ ოსტინმა განაცხადა, რომ აშშ უკრაინის საზღვართან სიტუაციას ყურადღებით აკვირდება.