მედვედევი აგვისტოს ომზე: რუსეთი ყოველთვის მზად არის საკუთარი მოქალაქეების დასაცავად

რუსეთის პრემიერმინისტრი დიმიტრი მედვედევი რუსეთ-საქართველოს 2008 წლის აგვისტოს ომთან დაკავშირებით Facebook-ზე განცხადება გამოაქვეყნა.

მედვედევის განცხადებით, რუსეთი ყოველთვის მზად არის საკუთარი მოქალაქეების დასაცავად, როგორც ეს 2008 წლის აგვისტოში გააკეთა.

"ჩვენ 2008 წლის აგვისტოს ტრაგიკულ დღეებს ვიხსენებთ. ცხინვალის მძინარე მოსახლეობასა და რუსს მშვიდობისმყოფელებზე თავდასხმა, რომელიც საქართველოს მაშინდელმა ხელისუფლებამ განახორციელა, წინასწარ ორგანიზებული იყო... ყველაზე დიდი საშინელება ის არის, რომ მშვიდობიანი მოსახლეები დაიღუპნენ. ეს ბარბაროსობა უნდა შეგვეჩერებინა. შესაბამისად, რუსეთმა მშვიდობის უზრუნველყოფისთვის ოპერაცია დაიწყო. სხვაგვარად მოქცევა არც შეიძლებოდა, არც კანონისა და არც სინდისის თვალსაზრისით. ჩვენ იძულებულნი ვიყავით დაგვეცვა ჩვენი მოქალაქეები. ვგულისხმობ როგორც სამხრეთ ოსეთის იმ მცხოვრებლებს, რომელთაც რუსული პასპორტები აქვთ, ასევე ჩვენ მშვიდობისმყოფელებს, რომლებიც საერთაშორისო საზოგადოების გადაწყვეტილებას ასრულებდნენ და რეგიონში სტაბილურობას იცავდნენ. ჩვენ ისინი დავიცავით.

რუსეთი ყოველთვის მზად არის საკუთარი მოქალაქეების დასაცავად", - წერს მედვედევი.

აგვისტოს ომის შესახებ დღეს განცხადება გაავრცელა დეფაქტო აფხაზეთის პრეზიდენტმა რაულ ხაჯიმბამ. მისი თქმით, რუსეთმა არ დაუშვა სამხრეთ ოსეთის განადგურება. 

ოკუპირებულ აფხაზეთსა და ე.წ. სამხრეთ ოსეთში, აგვისტოს ომის მე-9 წლისთავთან დაკავშირებით ღონისძიებები გაიმართა. სოხუმში, სამხრეთ ოსეთის საელჩოს, აფხაზეთის ე.წ. პრეზიდენტი რაულ ხაჯიმბა ეწვევა. 

დღეს აგვისტოს ომის მე-9 წლისთავია. საქართველოში რუსული ინტერვენციის შედეგად დაიღუპა საქართველოს 228 მშვიდობიანი მოქალაქე, 14 პოლიციელი, ხოლო 1 747 დაიჭრა. სახლები დატოვა თითქმის 150 000-მა ადამიანმა, მათგან დღემდე დევნილობაში რჩება 30 000-მდე. რაც შეეხება ომში დაღუპულ სამხედრო მოსამსახურეებს, თავდაცვის სამინისტროს მონაცემებით, სულ დაღუპულად 169 სამხედრო მიიჩნევა, აქედან ხუთი უგზო-უკვლოდ დაკარგულია.