აშშ კუბას ამერიკელ დიპლომატებზე აკუსტიკურ თავდასხმაში ადანაშაულებს

ამერიკელმა დიპლომატებმა კუბაზე სმენა დაკარგეს. აშშ-ში მიაჩნიათ, რომ მათზე შესაძლოა "აკუსტიკური იერიში" მიიტანეს. ფაქტი 2016 წელს მოხდა, თუმცა ამის შესახებ ცნობილი ახლა გახდა. ისტორია პირველმა სააგენტო Associated Press-მა გაიგო.

სააგენტოს ინფორმაციით, 2016 წლის შემოდგომაზე, კუბაზე ამერიკის საელჩოს დაახლოებით ხუთმა თანამშრომელმა ერთდროულად დაიჩივლა, რომ სმენა დაკარგეს. დიპლომატები არამხოლოდ სმენის დაკარგვაზე ჩიოდნენ, არამედ ისეთ სიმპტომებს აღწერდნენ, რომ სავარაუდოდ ტვინის შერყევაც ჰქონდათ. ორმა დიპლომატმა კუბა დატოვა და სამკურნალოდ გაემგზავრა. მათგან ერთ-ერთი დღეს სმენის აპარატს იყენებს.

არაოფიციალურად, ამერიკელი ჩინოსნები ამბობენ, რომ დილომატები დაშავდნენ რაღაც მოწყობილობის გამო, რომელსაც შეუძლია ისეთი ბგერების გამოცემა, რომელიც ადამიანს არ ესმის (ინფრაბგერა - რაც ადამიანის სმენადობის მინიმალურ სიხშირულ ზღვარს შეესაბამება. მას შეუძლია გამოიწვიოს გულისრევა, თავის ტკივილი, უჰაერობა და სხვ). ამერიკელებმა არ იციან სად იყო ეს მოწყობილობა დამონტაჟებული - დიპლომატების საცხოვრებელი შენობის შიგნით თუ გარეთ. უცნობია ისიც, იყო თუ არა ეს სპეციალურად დაგეგმილი შეტევა თუ შემთხვევითობა. არც დაშავებულების და არც სიმპტომების შესახებ ოფიციალური მონაცემები არ ვრცელდება.

კუბა აცხადებს, რომ ამერიკელი დიპლომატების სმენის დაკარგვასთან არანაირი კავშირი არ აქვს. კუნძულის საგარეო საქმეთა სამინისტროში განაცხადეს, რომ ამ ფაქტის შესახებ ქვეყნის ხელისუფლებამ 2017 წლის თებერვალში გაიგო. კუბელი ჩინოსნები ამტკიცებენ, რომ მაშინვე დაიწყეს გამოძიება, თუმცა მის შედეგებზე არაფერს ამბობენ.

2017 წლის მაისში, აშშ-დან ორი კუბელი დიპლომატი გააძევეს. აშშ-ის სახელმწიფო დეპარტამენტის თანამშრომელმა ჰიზერ ნოიერტმა კუბელების გაძევება იმით ახსნა, რომ ვენის კონვენციის თანახმად (დიპლომატიური ურთიერთობების შესახებ), კუბის ხელისუფლებას უნდა დაეცვა ამერიკელი დიპლომატები, მაგრამ ეს ვერ შეძლო. კუბაზე დიპლომატების გაძევებას უსაფუძვლო უწოდეს.

აშშ-ში არ გამორიცხავენ, რომ ამერიკელ დიპლომატებზე თავდასხმის ორგანიზატორია მესამე ქვეყანა, მაგალითად რუსეთი. CNN-ის წყაროს თქმით, ვინმეს შეეძლო ამერიკაზე შურსძიების მიზნით, სხვა ტერიტორიაზე ემოქმედა, ან ამით აშშ-ის და კუბის წაჩხუბებას შეეცადა. ტელეკომპანიის წყარო ამტკიცებს, რომ თუ ეს შეტევა იყო, მაშინ ის კუბის სპეცსამსახურების ჩარევის გარეშე ვერ მოხდებოდა. კუბაზე გამოძიებისთვის ჩასვლას გეგმავენ ფედერალური აგენტები (FBI).

მას შემდეგ, რაც მედიისთვის ცნობილი გახდა ამერიკელი დიპლომატების ისტორიის შესახებ, კანადის საგარეო საქმეთა სამინისტრომ განაცხადა, რომ მსგავსი სიმპტომები მათ თანამშრომელსაც აწუხებდა. როდის ჩიოდა კანადელი სიმპტომებზე, ამას კანადის საგარეო უწყება არ აკონკრეტებს, თუმცა დასძენს, რომ გამოძიებას აშშ-სთან და კუბასთან ერთად აწარმოებს.