კანადის სანაპიროსთან, ესპანური თევზსაჭერი გემის ჩაძირვას მსხვერპლი მოჰყვა

კანადის აღმოსავლეთ სანაპიროსთან, ნიუფაუნდლენდთან, ესპანური ტრაულერი (თევზსაჭერი გემი) ჩაიძირა. გემზე სულ 24 ადამიანი იყო - 16 ესპანელი, 5 პერუელი და 3 განელი. მაშველებმა მხოლოდ 3 ადამიანის გადარჩენა შეძლეს, 9 ცხედარი იპოვეს და 12 დაკარგულად მიიჩნევა, - ამის შესახებ BBC წერს.

„განადგურებული ვარ, ამის ატანა არ შემიძლია. შვილებს ვერ ვაჩვენებ, როგორ ვგრძნობ თავს, რადგან მათ ჯერ არ იციან“, - ამბობს ერთ-ერთი დაკარგულის, 29 წლის კაცის მეუღლე, რომელსაც 4 შვილი ჰყავს.

ჯერ უცნობია, რამ გამოიწვია ტრაულერის ჩაძირვა. გემი 2004 წელს ააგეს. ტრაგედიის მსხვერპლთა პატივსაცემად, მადრიდში, პარლამენტის სხდომა წუთიერი დუმილით გაიხსნა.

ესპანეთის სოფლის მეურნეობისა და მეთევზეობის მინისტრმა ლუის პლანასმა თქვა, რომ ეს ყველაზე დიდი ტრაგედიაა მეთევზეობის ინდუსტრიაში 1984 წლის შემდეგ, როდესაც კანარის კუნძულებზე ნავი „ისლამარ III“ ჩაიძირა. შემთხვევას 26 ადამიანის სიცოცხლე შეეწირა.