პოლონეთის პრეზიდენტის მრჩეველი: აშშ-ს არ სურს, რომ თვითმფრინავები უკრაინაში ამერიკული ბაზებიდან ჩავიდეს - პოლონეთი მზად არის, იმოქმედოს, თუმცა მხოლოდ ნატოს ფარგლებში

უკრაინისთვის საბრძოლო თვითმფრინავების ნებისმიერი მიწოდება ნატოს მეშვეობით უნდა განხორციელდეს, - განაცხადა საგარეო საკითხებში პოლონეთის პრეზიდენტის მრჩეველმა, იაკუბ კუმოხმა.

„აშშ-ს არ სურს, რომ ეს თვითმფრინავები უკრაინაში ამერიკული ბაზებიდან ჩავიდეს. პოლონეთი მზად არის, იმოქმედოს, თუმცა მხოლოდ ნატოს ფარგლებში“, - აღნიშნა იაკუბ კუმოხმა პოლონეთის საზოგადოებრივ მაუწყებელ TVP Info-სთან ინტერვიუში.

პოლონეთის საგარეო საქმეთა მინისტრის მოადგილემ, პაველ იაბლონსკიმ საზოგადოებრივ რადიოსადგურ Polskie Radio 1-ს განუცხადა, რომ პოლონეთს უკრაინისთვის თვითმფრინავების მიწოდების განხილვისას პრიორიტეტი თავის უსაფრთხოებაზე უნდა მიენიჭებინა.

მანამდე პენტაგონმა არ მიიღო პოლონეთის წინადადება MiG-29 ტიპის გამანადგურებლების უკრაინაში მიწოდების მიზნით გადაცემის შესახებ. უწყების პრესმდივნის, ჯონ კირბის განცხადებით, პენტაგონს არ სჯერა, რომ პოლონეთის წინადადება თანამიმდევრულია.

პოლონეთის ხელისუფლება, პრეზიდენტსა და მთავრობას შორის კონსულტაციების შემდეგ, მზად არის, თავისი ყველა MIG-29 „რამშტაინის“ საავიაციო ბაზაზე დაუყოვნებლივ და უფასოდ განათავსოს და აშშ-ის მთავრობის განკარგულებაში გადასცეს.

„ამავდროულად, პოლონეთი აშშ-ს სთხოვს, მოგვაწოდოს მეორადი თვითმფრინავები შესაბამისი ოპერატიული შესაძლებლობებით. პოლონეთი მზად არის, დაუყოვნებლივ დაადგინოს თვითმფრინავების შესყიდვის პირობები. პოლონეთის მთავრობა ასევე სთხოვს ნატოს სხვა მოკავშირეებს, რომლებსაც MIG-29 აქვთ, იმავე პრინციპით იმოქმედონ“, - ნათქვამია განცხადებაში.

6 მარტს, აშშ-ის სახელმწიფო მდივანმა, ენტონი ბლინკენმა განაცხადა, რომ ნატოს წევრმა ქვეყნებმა მწვანე შუქი მიიღეს უკრაინისთვის საბრძოლო თვითმფრინავების მიწოდებაზე.