შარლ მიშელი: „დიდი შვიდეულის“ დისკუსიები უკრაინაში არსებულ ვითარებაზე იქნება ფოკუსირებული - უკრაინას მეტი სჭირდება და ჩვენ მზად ვართ, მეტი მივაწოდოთ, რაც უფრო მეტ სამხედრო, ფინანსურ და პოლიტიკურ მხარდაჭერას გულისხმობს

„დიდი შვიდეულის“ დისკუსიები უკრაინაში არსებულ ვითარებაზე იქნება ფოკუსირებული. რუსეთის ომმა უკრაინის წინააღმდეგ მსოფლიო რისკის ქვეშ დააყენა, რაც მკვეთრად აისახა სურსათისა და ენერგიის მიწოდებაზე, ასევე ფასებსა და ინფლაციაზე“, - ამ სიტყვებით დაიწყო ევროპული საბჭოს პრეზიდენტმა, შარლ მიშელმა, გერმანიაში, „დიდი შვიდეულის“ სამიტის დაწყებამდე გამართულ პრესკონფერენციაზე საუბარი.

მისი თქმით, ევროპა სამომავლოდაც გააგრძელებს საომარ მდგომარეობაში მყოფი ქვეყნის მხარდაჭერას.

„პირველივე დღიდან, ჩვენი პასუხი იყო ურყევი ერთიანობა და გვქონდა ორმხრივი მიდგომა, რომელიც უკრაინის მხარდაჭერასა და რუსეთის წინააღმდეგ სანქციების დაწესებას გულისხმობს. ევროკავშირი გააგრძელებს უკრაინის მტკიცე ფინანსურ, ჰუმანიტარულ და პოლიტიკურ მხარდაჭერას, ასევე, მობილიზებულია 2 მილიარდი ევრო სამხედრო აღჭურვილობის უზრუნველსაყოფად. უკრაინას მეტი სჭირდება და ჩვენ მზად ვართ, მეტი მივაწოდოთ. ეს გულისხმობს უფრო მეტ სამხედრო, ფინანსურ და პოლიტიკურ მხარდაჭერას. ჩვენ ასევე მზად ვართ, მხარი დავუჭიროთ უკრაინის აღდგენას. რაც შეეხება სანქციებს, ევროკავშირმა რუსეთის წინააღმდეგ მკაცრი სანქციების ექვსი პაკეტი დააწესა, რათა შეაჩეროს რუსეთის შესაძლებლობა ომის წარმოებისთვის. უახლესი პაკეტი, რომელიც რამდენიმე კვირის წინ დაწესდა, აკრძალავს რუსული ნავთობის 90%-ის იმპორტს ევროკავშირში, მიმდინარე წლის ბოლომდე“, - განაცხადა შარლ მიშელმა.