როგორ შეიძლება ევროპაში მოვლენები განვითარდეს - ავსტრიის პრეზიდენტმა პუტინისა და ევროპის ქვეყნების მოქმედებების სამი შესაძლო სცენარი დაასახელა

ავსტრიის პრეზიდენტმა, ალექსანდერ ვან დენ ბელენმა, რუსეთ-უკრაინის ომის კონტექსტში, ევროპაში მოვლენების შემდგომი განვითარების სამი შესაძლო სცენარი დაასახელა.

პირველი სცენარის თანახმად, პუტინი ყველაფერს აწონ-დაწონის, გააცნობიერებს, რომ ომი უნდა დაასრულოს, ევროპას დაუახლოვდეს, ბლოკადები მოხსნას და მიხვდება, რომ რუსეთსა და ევროკავშირს შორის თანაარსებობა შესაძლებელია.

ავსტრიის პრეზიდენტის თქმით, ამ შემთხვევაში, იარსებებს „გაყინული კონფლიქტი“ და „მომდევნო რამდენიმე წლის განმავლობაში, ევროპა გააგრძელებს ცხოვრებას ისე, როგორც ეს ადრე იყო, გაზის მიწოდების შეფერხება აღარ იარსებებს. აქვე, ალექსანდერ ვან დენ ბელენი ამბობს, რომ ეს ვარიანტი ნაკლებად სავარაუდოა.

მეორე სცენარის მიხედვით, „ევროპა წყვეტს სანქციებს“ და „უკრაინას ბედის ანაბარა ტოვებს“. ამ შემთხვევაში, რუსული გაზის ევროპისთვის მიწოდება გაგრძელდება და „ყველა იცხოვრებს ისე, როგორც ადრე“.

ავსტრიის პრეზიდენტის თქმით, ამ შემთხვევაში, ევროპელები მომავალში „კიდევ უფრო მაღალ ფასს გადაიხდიან“. „ამ სცენარით, ჩვენ მოგვიწევს, გადავიხადოთ ჩვენი სუვერენიტეტით, ჩვენი უსაფრთხოებითა და, უპირველეს ყოვლისა, ჩვენი თავისუფლებით. პუტინი არ ებრძვის სანქციებს. ის აწარმოებს იმპერიალისტურ ომს“, - თქვა ავსტრიის პრეზიდენტმა.

ალექსანდერ ვან დენ ბელენის განცხადებით, ყველაზე რეალური მესამე სცენარია, რომლის მიხედვითაც, „ყველაფერი ისე გაგრძელდება, როგორც ახლაა და, შეიძლება, უფრო გაუარესდეს კიდეც“.

„პუტინი გააგრძელებს სასტიკ ომს, ჩვენთვის გაზის მოწოდების შემცირებას, შესაძლოა, ის საერთოდ შეაჩეროს კიდეც, თუ მას ასე ესიამოვნება. ის ამაზე წამითაც არ იყოყმანებს, თუ მიზანშეწონილად ჩათვლის. ჩვენ უნდა მოვემზადოთ ამისთვის. ახლავე“, - თქვა ალექსანდერ ვან დენ ბელენმა.