პერე ჯოან პონსი: აშშ-ს წინაშე არსებული დემოკრატიული გამოწვევები მსგავსია ეუთოს ბევრ ქვეყანაში არსებული გამოწვევების და ჩვენ ყველამ ერთად უნდა ვიმუშაოთ, რომ უზრუნველვყოთ დემოკრატიული პროცესების მიმართ მოქალაქეების ნდობა

ძლიერი და მდგრადი დემოკრატიისთვის მნიშვნელოვანია, რომ შეერთებულმა შტატებმა განაგრძოს საარჩევნო სისტემის გაუმჯობესების მიმართ თავისი ერთგულების დემონსტრირება არჩევნებში მონაწილეობის უფლებების გაზრდის, არჩევნების უსაფრთხოების გაძლიერების და დეზინფორმაციის წინააღმდეგ შესაბამისის ზომების გამოყენების გზით,- ამის შესახებ ეუთოს საპარლამენტო ასამბლეის დელეგაციის ხელმძღვანელმა პერე ჯოან პონსმა განაცხადა.

„აშშ-ს წინაშე არსებული დემოკრატიული გამოწვევები მსგავსია ეუთოს ბევრ ქვეყანაში არსებული გამოწვევების და ჩვენ ყველამ ერთად უნდა ვიმუშაოთ, რომ უზრუნველვყოთ დემოკრატიული პროცესების მიმართ მოქალაქეების ნდობა“, - აღნიშნა პონსმა.

ეუთოს დემოკრატიული ინსტიტუტებისა და ადამიანის უფლებათა ოფისი (OSCE/ODIHR) 8 ნოემბერს აშშ-ის კონგრესში გამართულ შუალედურ არჩევნებზე წინასწარ დასკვნებს ავრცელებს, რომელშიც ნათქვამია: „დამკვირვებლებმა აღნიშნეს, რომ შევიწროების, მუქარისა და ძალადობის შემთხვევების შესახებ შეშფოთების მოტივით კონგრესმა გამოყო თანხები არჩევნების უსაფრთხოების უზრუნველსაყოფად, მათ შორის საარჩევნო ოფიციალური პირების მიმართ მუქარის წინააღმდეგ ზომების მისაღებად. შეიქმნა იუსტიციის დეპარტამენტისა და გამოძიების ფედერალური ბიუროს ერთობლივი სამუშაო ჯგუფი, რომელსაც დაევალა საფრთხეების შესახებ ინფორმაციის შეგროვება და ფედერალურ დონეზე მათი მოგვარება.

მიუხედავად იმისა, რომ მრავალფეროვან, მაგრამ პოლარიზებულ მედია სივრცეში ბევრი მედია საშუალება ცდილობდა ზუსტი ინფორმაციის მიწოდებას, სხვა საშუალებების მიერ ფართოდ გავრცელებულმა დეზინფორმაციამ გავლენა იქონია ამომრჩევლების მიერ ინფორმაციის სწორად აღქმაზე“, -წერია ანგარიშში.

„არსებული აქტიური, პლურალისტური მედია გარემო თავისთავად წარმოადგენს კონკურენტული არჩევნების წინაპირობას “, - აღნიშნა ეუთოს დემოკრატიული ინსტიტუტებისა და ადამიანის უფლებათა ოფისის შეზღუდული არჩევნების სადამკვირვებლო მისიის ხელმძღვანელმა ტანა დე ზულუეტამ.

„მაგრამ როდესაც პროცესების გაშუქებისა და კომენტარების კონტენტი და ხასიათი დამამცირებელი და ხშირად შეურაცხმყოფელია პროცესში ჩართული პირების მიმართ - პოლიტიკური ოპონენტების, საარჩევნო კომისიის ხელმძღვანელობის და ზოგიერთ შემთხვევაში თავად ამომრჩევლის მიმართ - ეს ქმნის გარემოს, რომელმაც, როგორც დავინახეთ, შეიძლება გამოიწვიოს მუქარა და დაშინება და ძალადობაც კი და იმავდროულად ხელი არ შეუწყოს მოქალაქეების მიერ ობიექტური და ფაქტებზე დაფუძნებული ინფორმაციის მიღებას“.

„ხმის მიცემის ალტერნატიული მეთოდები მოიცავს ადრეულ პირად და დაუსწრებელ ხმის მიცემას, რაც ამომრჩეველს ხმის მიცემის ბევრ ვარიანტს აძლევს. მიუხედავად იმისა, რომ დაუსწრებელი ხმის მიცემა არ იძლევა კენჭისყრის ფარულობის გარანტიას, ამ მეთოდების მოხერხებულობა აღინიშნა უმრავლესობა ამომრჩევლის მიერ, ვისაც გაესაუბრა დამკვირვებლები. ისინი თვლიან, რომ ეს მეთოდები ზრდიან საარჩევნო პროცესში მონაწილეობას, უმეტესობა დარწმუნებულია მათ სამართლიანობაში. პოლიტიკოსებისა და მედიის კომენტატორების მიერ გავრცელებულმა დაუდასტურებელმა მტკიცებულებებმა, რომ დაუსწრებელი ხმის მიცემისას ბიულეტენების და საარჩევნო ყუთების გამოყენებამ გამოიწვია 2020 წლის არჩევნების გაყალბება, უარყოფითად იმოქმედა მიმდინარე საარჩევნო პროცესისადმი ნდობის ფაქტორზე.
განცხადებაში ასევე ყურადღება გამახვილებულია რამდენიმე სხვა საკითხზე. რაც შეეხება საარჩევნო კამპანიის დაფინანსებას, დამკვირვებლებმა აღნიშნეს, რომ მიუხედავად იმისა, რომ კანდიდატების, პარტიებისა და „დამოუკიდებელი“ კომიტეტების მიერ შემოსავლებისა და ხარჯების გამჟღავნება უზრუნველყოფს საკმარის გამჭვირვალობას, საარჩევნო კამპანიაში ჩართული გადასახადებისგან გათავისუფლებული ორგანიზაციების მხრიდან ინფორმაციის გამჟღავნების ნაკლებობა ეჭვის ქვეშ აყენებს საარჩევნო კამპანიის გამჭვირვალობას. აღნიშნული იქნა, რომ ამომრჩეველთა პირადობის მოწმობის მოთხოვნები, რომლებსაც იყენებენ 35 შტატში, შეესაბამება არჩევნების სტანდარტებს და იძლევა არჩევნების სამართლიანად ჩატარების გარანტიებს, მაგრამ პირადობის მოწმობები ზოგიერთ შტატში ყველა უფლებამოსილი მოქალაქისთვის არ იყო თანაბრად ხელმისაწვდომი, რითაც დაირღვა ზოგიერთი უმცირესობისა და ეკონომიკურად დაუცველი ჯგუფის წევრების მიერ თანაბარი ხმის მიცემის უფლება“, - აღნიშნულია ანგარიშში.