იენს სტოლტენბერგი: მივესალმები გადაწყვეტილებას უკრაინელი პილოტების მომზადების შესახებ. ეს მნიშვნელოვანი და ძალიან მკაფიო სიგნალია, რომ ჩვენ გრძელვადიან პერსპექტივაში განვიხილავთ უკრაინის მხარდაჭერას

მივესალმები გადაწყვეტილებას უკრაინელი პილოტების მომზადების შესახებ. ეს ასევე მნიშვნელოვანი და ძალიან მკაფიო სიგნალია, რომ ჩვენ გრძელვადიან პერსპექტივაში განვიხილავთ უკრაინის მხარდაჭერას, - ამის შესახებ ნატოს გენერალურმა მდივანმა, იენს სტოლტენბერგმა განაცხადა.

„პრეზიდენტმა პუტინმა დაიწყო ეს ომი, მას შეუძლია დაასრულოს ეს ომი დღესვე დაასრულოს. ჩვენ უნდა გვახსოვდეს, რა არის ეს: ეს არის აგრესიის ომი. უკრაინას აქვს თავდაცვის უფლება, ისინი საკუთარ თავს და საკუთარ ტერიტორიას იცავენ, ხოლო თავდაცვის უფლება გაეროს წესდებაშია გათვალისწინებული. ჩვენ ვეხმარებით უკრაინას ამ უფლების დაცვაში. ეს არის ჩვენი უფლება და მოვალეობა დავეხმაროთ მათ გაეროს კანონის, საერთაშორისო სამართლის დაცვაში ამ აგრესიულ ომში. ეს არ აქცევს ნატოს, ნატოს მოკავშირეებს კონფლიქტის მხარეებად, მაგრამ ჩვენ მხარს ვუჭერთ უკრაინას, რომ დაიცვას თავი აგრესიულ და პრეზიდენტ პუტინის მიერ უკრაინის წინააღმდეგ წარმოებულ სასტიკ ომში. ძალიან მნიშვნელოვანია, რომ გავზარდოთ საბრძოლო მასალის წარმოება. ეს არის ის, რაზეც ჩვენ უკვე დიდი ხანია ვართ ორიენტირებული და შემოდგომაზე ნატოში პირველი შეხვედრებიც გვქონდა. მე ასევე შევხვდი საგარეო საქმეთა მინისტრს უკრაინიდან კულებას, ბორელს და შევთანხმდით, რომ კიდევ უფრო მჭიდროდ ვითანამშრომლებთ, გაიზრდება ჩვენი ძალისხმევა და კოორდინაცია უკრაინას, ევროკავშირსა და ნატოს შორის“, - აცხადებს ნატოს გენერალური მდივანი.

მისივე თქმით, ყოველთვის მნიშვნელოვანია ახალი პლატფორმების, თვითმფრინავების, საბრძოლო ტანკების, საჰაერო თავდაცვის სისტემების საკითხის განხილვა.

„კიდევ უფრო მნიშვნელოვანია უზრუნველყოფილი იყოს, რომ ყველა სისტემა, რომელიც უკვე არის უკრაინაში, მუშაობდეს და ფუნქციონირებდეს ისე, როგორც საჭიროა და ამისათვის მათ სჭირდებათ საბრძოლო მასალა, საწვავი, სათადარიგო ნაწილები, ტექნიკური მომსახურება. ახლა არის ცვეთის ომი, რაც გადაიქცევა
ლოჯისტიკის და შემდეგ წარმოების ბრძოლად. ამიტომ წარმოების გაზრდა უმთავრესია. ყოველთვის ვაკეთებთ აქცენტს იმაზე, თუ რა შეგვიძლია გავაკეთოთ იმისათვის, რომ უფრო მეტად დავეხმაროთ ინდუსტრიას და მოვახდინოთ კიდევ უფრო მეტი კონტრაქტის მობილიზება.

ჩვენ ვაწარმოეთ ერთობლივი შესყიდვები, რაც ნიშნავს, რომ მოკავშირეები ერთად ყიდულობენ საბრძოლო მასალას და იარაღს და ეს ბევრი წელია ასე ხდება. ჩვენ გვაქვს დიდი მიმდინარე პროექტები. ზოგიერთი მათგანი ნატოს მოკავშირეების მიერ არის ორგანიზებული ჯგუფურად. შესყიდვები ასევე ორგანიზებულია ნატოს მხარდაჭერისა და შესყიდვების სააგენტოს, NSPA-ს მეშვეობით და ამჟამად ბევრი პროექტი განხორციელების პროცესშია. მნიშვნელოვანია გამოვიყენოთ ყველა არსებული ინსტრუმენტი, მათ შორის კარგად ჩამოყალიბებული ნატოს სტრუქტურები, კოორდინაციისთვის და ერთობლივი შესყიდვების უზრუნველსაყოფად და კონტრაქტების ხელმოწერისთვის, რათა ინდუსტრიამ წარმოება გაზარდოს“, - აცხადებს სტოლტენბერგი.