„დივალის“ შემდეგ დელიში ჰაერის ხარისხი მნიშვნელოვნად გაუარესდა

ინდოეთის დედაქალაქში ფესტივალ „დივალის“ შემდეგ ჰაერის ხარისხი მნიშვნელოვნად გაუარესდა. ამის შესახებ BBC წერს.

გამოცემის ინფორმაციით, კვირას დელიში მოსახლეობამ ჰაერის დაბინძურების ისედაც მაღალი ხარისხის გამო დაწესებული აკრძალვა დაარღვია და ფოიერვერკები გაუშვა. ქალაქი ტოქსიკურ ჰაერს უკვე რამდენიმე კვირაა ებრძვის, თუმცა ფოიერვერკებმა ვითარება დაამძიმა.

„ფოიერვერკებმა დელიში დაბინძურების ხარისხი გაზარდა. ეს ბევრ ადამიანს არ გაუკეთებია, მაგრამ გარკვეულ ადგილებში ადამიანებმა აკრძალვა დაარღვიეს“, - განაცხადა დელის გარემოს მინისტრმა გოპალ რაიმ. მისივე თქმით, ხალხს ფოიერვერკების გამოყენებისკენ ინდუისტურმა ნაციონალისტურმა პარტიამ „ბჰარატია ჯანათამ“ მოუწოდა, რომლის წევრებსაც აკრძალვა ინდუისტურ ფესტივალებზე თავდასხმად მიიჩნიეს.

ორშაბათის მონაცემებით, ჰაერის ხარისხის ინდექსმა დელის მონიტორინგის რამდენიმე სადგურზე 200-ს გადააჭარბა, ზოგ ადგილში კი 350-ს, მაშინ როდესაც ნორმალურ მაჩვენებლად 101-დან 200-მდე ითვლება. დაბინძურებული ჰაერით დიდი ხნის განმავლობაში სუნთქვა ადამიანის ჯანმრთელობას აზიანებს.

დელიში ჰაერის დაბინძურებას სატრანსპორტო საშუალებების გამონაბოლქვი და მტვერი უწყობს ხელს. პრობლემა ზამთარში მწვავდება, როდესაც მეზობელ შტატებში ფერმერები ნაწვერალს წვავენ. ქარის დაბალი სიჩქარე კი ატმოსფეროს ქვედა ფენაში დამაბინძურებელი ნივთიერებების გაჩერებას უწყობს ხელს.