Politico: ტრამპი ირანის ბირთული შეთანხმების გადახედვაში ნიკი ჰეილიმ დაარწმუნა

ჟურნალ Politico-ს ინფორმაციით, პრეზიდენტ ტრამპს ირანის ბირთული შეთანხმების გადახედვა გაეროში აშშ-ის მუდმივმა წარმომადგენელმა ნიკი ჰეილიმ ურჩია. გამოცემის ინფორმაციით, აშშ-ის სახელწმიფო მდივანმა რექს ტილერსონმა და თავდაცვის მდივანმა ჯეიმს მეტისმა ივლისში გამართულ შეხვედრაზე ტრამპი დაარწმუნეს, რომ ირანი შეთანხმების პირობებს ასრულებს. თუმცა მაშინ, როცა თეთრი სახლის ადმინისტრაციის სხვა წევრები უფრო ფრთხილ პოლიტიკას ამჯობინებდნენ, გაეროში ქვეყნის წარმომადგენელი სხვა აზრის იყო.

ნიკი ჰეილიმ ივლისის შეხვედრის დროს ტრამპს უთხრა, რომ თავის მოსაზრებებს დაამტკიცებდა, რაზეც პრეზიდენტმა თანხმობით უპასუხა. გამოცემა წერს, რომ ჰეილი ირანის საკითხთან დაკავშირებით ტრამპის „შინაგანი ხმა“ გახდა. ამასთან, Politico-ს ინფორმაციით, სწორედ მას განიხილავენ სახელმწიფო მდივნის თანამდებობაზე ტილერსონის გადადგომის შემთხვევაში. 

აშშ-ის პრეზიდენტმა დონალდ ტრამპმა განაცხადა, რომ ირანთან ბირთვული შეთანხმების დოკუმენტს გადახედავს. მისი თქმით, ირანი არ ასრულებს გარიგების მოთხოვნებს, რის შესახებაც ის კონგრესს აცნობებს. 

ირანის პრეზიდენტმა ტრამპის ბრალდებებს სისულელე უწოდა.

ირანმა და ექვსმა შუამავალმა ქვეყანამ 2015 წლის 14 ივლისს ისტორიულ შეთანხმებას მიაღწიეს ირანული ატომის მრავალწლიანი პრობლემის დარეგულირების მიმართულებით. ამ შეთანხმების ფარგლებში მიიღეს მოქმედების გეგმა, რომლის საფუძველზეც ირანს აშშ-ის, ევროკავშირის და გაეროს უშიშროების საბჭოს მიერ დადებული ეკონომიკური და ფინანსური სანქციები უნდა მოხსნოდა. ეს გეგმა 2016 წლის 16 იანვრიდან ამოქმედდა. მხოლოდ ტრამპი აცხადებდა, რომ გარიგებიდან გასვლას გეგმავს. გარიგების ყველა სხვა მონაწილე შეთანხმებაში რჩება.